Author Archive

தைப் பெயர்ச்சி!

January 14, 2011

தைத்திங்கள் முதல் நாளில் இருந்து ஐயன் wordpress தளத்தை விட்டு blogger தளத்துக்குப் பெயர்கிறார்.

ஐந்தாம் இடத்தில் திரட்டிகளின் வசதியும், பதினோராம் இடத்தில் HTML editing சௌகர்யமும் சேர்வதால் இந்தப் பெயர்ச்சி நடக்கிறது.

செவ்வாய் நீசத்தில் இருந்ததால் இதுநாள் வரை சரியாகப் பதிவுலகில் சஞ்சரிக்க இயலாதிருந்த ஐயன் தற்போது சூரியன், புதன், சனி ஆல்கியோரின் துணையுடன் குருசுக்ர சுபாசீர்வாதத்தோடு புது இடத்துக்குப் பெயர்கிறார்.

தமிழ் கூறும் நல்லுலகோர் இனி இங்கே வருகை தந்து அளவளாவும்படி வேண்டிக் கேட்டுக் கொள்ளப்படுகிறார்கள்.

அனைவருக்கும் இனிய தைத்திருநாள் நல்வாழ்த்துக்கள். பொங்கலோ பொங்க்லென நன்மைகள் பொங்கி அனைவரும் சிறப்புற்று வாழ மீனாக்ஷி – சுந்தரேஸ்வரர் அருள் புரிய வேண்டிக் கொள்கிறேன்!

 

மொழிப் பிரச்சினை

January 11, 2011

சமீபத்தில் தெலுங்கு பையனிடம் பெயர் கேட்ட அமெரிக்கரின் கதையை மதுரை டமில் கையின் பதிவில் படித்தேன். திருமதி.சித்ராவின் கொஞ்சம் வெட்டிப்பேச்சு வலைப்பூவுக்கு சுட்டியிருந்தார். அதையும் படித்தேன். ஒரு எண்ணம் பளிச்சிட்டது. அடங்கொக்க மக்கா! அமெரிக்காகாரங்கிட்ட பீட்டருல மாட்டிக்கிட்டு முழிக்கிறது ஒரு பெரிய சமாச்சாரம் தான்.

ஆனால் தமிழ்நாட்டில், தலைநகர் சென்னையில் தமிழ்மொழி புரியாமல் முழித்த அனுபவம் எனக்கு உண்டு. கேளுங்கள் என் கதையை தமிழ் கூறும் நல்லுலகோரே!

நான் சென்னப்பட்டணத்துக்கு வந்த புதிது. முதல் மாதம் என் மாமா வீட்டில் ஓட்டியதால் பெரிதாக நகரம் புரிபடவில்லை.  பிறகு திருமயிலையில் மேன்ஷன் பார்த்து வந்து சேர்ந்த பிறகு வார விடுமுறையில் வெளியே கிளம்பினேன். அறைத்தோழர் ஒருவர் (ராமசாமி என்று பெயர்) உடன் வந்தார். என்னைப் போல தெற்கத்திக்காரர். அவர் சென்னையில் 10 ஆண்டுகளாக இருப்பவர். நகரத்தின் போக்குத் தெரிந்தவர். முக்கியமாக நகரத்தின் மொழி புரிந்தவர்!

“முதல் தடவையா போறோமே, மங்களகரமா கபாலி கோவில் போயிட்டு அப்புறம் சுத்தாலாமே” என்றார். சரி என்று போனோம். போகிற வழியில் பொன்னம்பல வாத்தியார் தெருவில் ந்டக்கும் போது என் அம்மா சொன்ன அறிவுரை ஞாபகம் வந்தது. (கூட இருக்கிற வரை சொல் பேச்சு கேட்டதில்லை என்பது உலகோடு ஒத்து வாழ்வதற்காகச் செய்தது!) “கோவிலுக்குப் போகும் போது பூ வாங்கிக் கொண்டு போ” என்று சொல்லியிருந்தார். நினைவு வந்ததும் அங்கே  ஊதுபத்தி விற்கும் ஒரு பெண்மணியிடம்

“அம்மா! பூக்கடை எங்கேங்க இருக்கு?’ என்று கேட்டேன்.

வேகமாக ஏதோ சொன்னார். புரியவில்லை.

மறுபடியும் “பூக்கடை எங்கேங்கம்மா இருக்கு?’ என்று கேட்டேன்.

“தோடா! செவுடா நீ? கோயிலாண்டகிதுன்னு எத்தினி வாட்டி சொல்லுவாங்கோ” என்றார்.

“ஐயோ இல்லீங்க. நீங்க சொன்னது புரியலீங்க. அதான் கேட்டேன்”, என்றேன். (கோவையில் 9 ஆண்டுகள் இருந்த பலன்களில் மரியாதையான தமிழும் ஒன்று.) இப்போதும் பூக்கடை எங்கே என்று அவர் சொன்னது எனக்குப் புரியவில்லை.

நண்பரிடம் கேட்டேன்,”என்ன இந்தம்மா இப்படி கோபப்படுறாங்க?”

“நீங்க கேட்ட கேள்விக்கு அந்தம்மா பதில் சொல்லியாச்சு. இப்படி பேசறதுக்கு பதிலா நான் ஊருக்குப் புதுசுன்னு தமுக்கடிகலாம்” என்று வெறுப்பேற்றின்னார்.

“புரியலைன்னாலும் புரிஞ்ச மாதிரி பாவலா காட்டணுமோ மெட்ராசுல?” என்றேன்.

அவர் விளக்கினார்,”கோயிலாண்டகிதுன்னா…. கோவிலுக்குப் பக்கத்துல இருக்குன்னு அர்த்தம். அதாவது கோவில் அண்டையில் இருக்கிறது. இப்பப் புரிஞ்சுதா” என்று சாலமன் பாப்பையா ஆக முயன்றார்.

பூக்கடைக்குச் சென்றதும் “500 பூ எவ்வளவு?” என்றேன்.

கிண்டல் சிரிப்போடு பார்த்த அந்த அம்மாள் “வெளிஊராபா உனுக்கு?” என்றார். நான் தங்கியிருக்கும் மேன்ஷனுக்கு அருகில் நடக்கும் மெஸ்ஸில் சிற்றுண்டி வாங்க தினம் வருவார் அவர். பார்த்திருக்கிறாராம்.

“எந்தூருபா?”

“ராஜபாளையம்.”

“எங்ககிதது?”

——————-!!!!!????

‘மதுரைக்கு அந்நாண்ட இருக்கு! 2 மொழம் மல்லிப்பூ குடு” என்றார் ராமசாமி.

(ஓ! ஊர் எங்க இருக்குங்கிறது தான் கேள்வியா?)

கோவிலுக்குள்ளே மொழிப் பிரச்சினை ஏதுமில்லை. என் சிவனும் நானும் சங்கத் த்மிழ் முதல் ஈழத்தமிழ் வரை, சம்ஸ்க்ருதம் முதல் C++ வரை எந்த மொழியும் பேசுவோம். எவன் கேட்பது? (மெட்ராஸ் பாஷை எனக்குத் தெரியாது. கபாலியும் கற்பகமும் நிச்சயம் பேசுவார்கள். நூற்றாண்டுகளாய் இதே ஊரில் இருக்கிறார்களே!!)

வெளியே வந்ததும் “Paris போவோமா?” என்றார் நண்பர்.

“அதை பரீ என்று தான் உச்சரிக்க வேண்டும், தெரியுமா? அது சரி! வீசா ஒடனே குடுப்பானா?” என்று வெறுப்பேற்றினேன்.

பாரீஸ் கார்னர் போனோம். சுற்றினோம். ராமசாமிக்குத் தெரிந்த கடையில் 2 T-shirtகள் வாங்கினேன். மரியாதையாகப் பேசி சில இடங்களில் ஆட்டோக்காரர்களிடம் அதிகப் பணம் கொடுக்க இருந்தேன். நண்பர் தலையிட்டு “எத்தீனி வர்சமா ஆட்டோ ஓட்டினுகிறே! நான் 10 வர்சமா கொடோன் ஸ்ட்ரீட்ல தான் கீறேன்” என்ற வகையில் பேசிக் காப்பாற்றினார்.

மறுநாள் ஆபீசுக்கு புது T-shirt அணிந்து சென்றேன். உடன் பணிபுரியும் ஒருவர் “T-shirt புச்சா மாமா?” என்றார். யோசித்துப் புரிந்து கொண்டு,” ஆமாம். புதுசு தான்” என்றேன்.

“நாசமாக்கீது மாமு” என்று சொல்லிவிட்டுப் போனார்.

காசு குடுத்து நம்ம வாங்கிருக்கோம். புடிக்கலைன்னா பேசாம போவானா………. பரதேசிப்பய இந்த வார்த்தயச் சொல்லிட்டுப் போறான்! என்று நினைத்துக் கொண்டு, மோரைக் கடைந்தால் வரும் பண்டத்தின் பெயரைச் சொல்லி அவரைத் திட்டிவிட்டு வேலையைப் பார்த்தேன்.

சற்று நேரம் கழித்து வேறொரு நபர் வந்தார்.

“T-shirt புச்சா தல?” என்றார்.

“ஆமாங்க. புதுசுதான்.” என்றேன்.

“மெய்யாலுமே நாசமாக்கிது தல!” என்று சொல்லிவிட்டுப் போனார்.

டேய்! வர்றவன் போறவன்லாம் இழுத்து வெச்சு லந்து பண்றீங்களாடா என்று மனதில் கறுவிக் கொண்டே வேலையை முடித்தேன்.

நடுவில் ஒருவர் தன் புதிய செல்பேசியைக் காட்டினார். 24000 ரூபாய் சோனி எரிக்சன் செட்.

“புச்சா வாங்கிகுறேன். எப்டிகிது? நாஸ்ஸமாகிதா?” என்றார்.

அட நாசமாப் போறவய்ங்க்யளா! நாசம்னா ஒங்க பாஷைல என்னடா அர்த்தம்!!!!!

மேன்ஷன் திரும்பியதும் நாசத்தைப் பற்றி ராமசாமியைக் கேட்டுத் தெளியவேண்டும், தப்பான அர்த்தம் தான்னா நாளைக்கு நாம யாருன்னு காட்டிரணும் என்ற முடிவோடு வேலை முடித்து வந்தேன்.

ராமசாமி வந்தார்.

“நாசம்னா மெட்ராஸ் பாஷைல என்ன அர்த்தம்?”

“புது T-shirt நாசமா இருக்குன்னு எவனாவது சொன்னானா?”

“ஒருத்தன் இல்லை 2  நாதாரிங்க!”

“அப்பவே சொல்லணும்னு இருந்தேன். மறந்துட்டேன். மெட்ராஸ் பாஷைல நாசம்னா நல்லதுன்னு அர்த்தம். நாசமா இருக்குன்னு சொன்னா சூப்பரா இருக்குன்னு அர்த்தம்!”

அடப் பாவிகளா! தமிழ நாசம் பண்ணிட்டீங்களேடா என்று மனதில் திட்டிக் கொண்டே ராமசாமியிடம் கேட்டேன்:

“ஓஹோ! அப்போ கல்யாண வீட்ல எப்புடி வாழ்த்தணும், மெட்ராஸ்ல?”

“இந்த நக்கலுக்கே மெட்ராசுல ஸ்கெட்சு போட்ருவான்”, என்றார் அவர்.

பின் வந்த நாட்களில் சென்னையின் பிரபல “ங்கோ” வார்த்தையை 4 வயது குழந்தைக்கு ஒருவர் சொல்லிக் கொடுக்கக் கண்டு அதிர்ந்தேன். குழந்தை அந்த வார்த்தையைச் உச்சரிப்புச் சுத்தமாய்ச் சொன்னதும் அதை அப்படிக் கொஞ்சினார்!!!

இது போன்று தமிழோடு ஏகப்பட்ட அனுபவங்கள் சென்னையில். 450 கோடி இல்லை 176000 கோடியையும் செலவு செய்து செம்மொழி மாநாடு போட்டாலும் சென்னையில் தமிழ் செழிக்க வாய்ப்பு மிகக் குறைவு தான்.

சுஜாதாவின் 10 commandments

January 5, 2011

சற்றே பழசு என்றாலும் relevant. படித்தேன். பிடித்தது. போட்டுவிட்டேன்.

1. ஒன்றின் மேல் நம்பிக்கை வேண்டும், ஏதாவது ஒன்று. உதாரணம் கடவுள், இயற்கை, உழைப்பு, வெற்றி இப்படி எதாவது… நம்பிக்கை நங்கூரம் போல. கேள்வி கேட்காத நம்பிக்கை. கேள்வி கேட்பது சிலவேளை இம்சை. நவீன விஞ்ஞானம் அதிகப்படியாகக் கேள்வி கேட்டு இப்போது தவித்துக் கொண்டிருக்கிறது.

2. அப்பா, அம்மா இரண்டு பேரும் வேலை சொல்வது பல சமயங்களில் கடுப்பாக இருக்கும். ஒருமாறுதலுக்கு அவர்கள் சொல்வதைச் செய்து பாருங்கள். அவர்கள் கேட்பது உங்களால் செய்யக் கூடியதாகவே இருக்கும். பொடிநடையாகப் போய் நூறு கிராம் காப்பி பவுடர் (அ) ரேஷன் கார்டு புதுப்பித்தல் இப்படிதான் இருக்கும்.

3. மூன்று மணிக்குத் துவங்கும் மாட்டனி போகாதீர்கள். க்ளாஸ் கட்பண்ண வேண்டி வரும். தலைவலி வரும். காசு விரயம். வீட்டுக்குப் போனதும் பொய் சொல்வதற்கு ரொம்ப ஞாபக சக்தி வேண்டும். இந்த உபத்திரத்துக்கு உண்மையைச் சொல்லிவிடுவது சுலபம். இளமைக்காலம், ஒளிக் கீற்றைப் போல் மிகவும் குறைந்த காலம், அதை க்யூ வரிசைகளிலும் குறைபட்ட தலைவர்களுக்காகவும் விரயம் செய்யாதீர்கள்.

4. நான்கு பக்கமாவது ஒரு நாளைக்குப் பொது விஷயங்களைப் படியுங்கள். பொது விஷயங்கள் என்றால் கதை, சினிமா, காதல் இல்லாதவை. உதாரணம் – யோக்கியமான செய்தித்தாள், மற்ற பேரைப் பற்றிக் கவலைப்படும் பத்திரிகைகள் அல்லது லைப்ரரியிருந்து ஒரு புத்தகம்.

5. ஐந்து ரூபாய் சம்பாதித்துப் பாருங்கள். சொந்தமாக உங்கள் உழைப்பில், முயற்சியில், யோக்கியமாக, மனச்சாட்சி உறுத்தாமல். அடுத்த முறை அப்பாவிடம் ஆயிரம் ரூபாய்க்கு ஷர்ட், சுடிதார் கேட்கும் முன்.

6. இந்தச் தகவல்களை படிக்கும் நிலைமை பெற்ற நீங்கள் இந்திய சனத்தொகையின் மேல்தட்டு ஆறு சதவிகித மக்களில் ஒருவர். அன்றாடம் சோற்றுக்காக அலையும், வசதியில்லாத கோடிக்கணக்கான மக்களைத் தினம் ஒரு முறை எண்ணிப் பாருங்கள்.

7. வாரத்தின் ஏழாவது தினமான ஞாயிறன்று என்ன செய்தாலும் காதல் பிஸினஸ் வேண்டாம். காதலுக்கு ரொம்பச் செலவாகும். மனம், வாக்கு, காயம்(உடல்), எல்லாவற்றையும் ஆக்கிரமிக்கும் தீ அது. பொய் நிறையச் சொல்ல வேண்டும். வினோதமான இடங்களில் காத்திருக்க வேண்டும். இந்த வயதில் நாசமாய்ப்போன படிப்புத்தான் உங்களுக்கு முக்கியம்.

குறிப்பு: பெண்களை சைட் அடிப்பதும், கலாட்டா பண்ணுவதும்,அவர்களுக்கு கர்சீப் முதலியன ரோடிலிருந்து பொறுக்கிக் கொடுப்பதும், உபத்திரமில்லாத கவிதைகள் எழுதுவதும், காதலோடு சேர்த்தியில்லை.

8. எட்டு முறை மைதானத்தை சுற்றி ஓடினால் எந்தச் சீதோஷ்ணமாக இருந்தாலும் நெற்றி வியர்வை அரும்பும். எதாவது தேகப் பயிற்சி செய்யவும். கடிகாரத்துக்குப் சாவி கொடுப்பதோ சீட்டாடுவதோ தேகப் பயிற்சி ஆகாது. எதையாவது தூக்குங்கள், எதையாவது வீசி எறியுங்கள். உங்கள் உடலில் ஊறும் உற்சாகத்துக்கு ஓர் ஆரோக்கியமான வடிகால் தேவை. ராத்திரி சரியாக தூக்கம் வரும். கன்னா பின்னா எண்ணங்கள் தவிர்க்கப்படும். ஒழுங்காக சாப்பிடத்தோன்றும். பொதுவாகவே சந்தோஷமாக இருக்கும்.

9. ஒன்பது மணிக்குள் வீட்டுக்கு வரவும். மிஞ்சிப் போனால் ஒன்பது மணி இரண்டு நிமிடம். ஒரு மணி நேரம் பாடம் அல்லது புத்தகம் படிக்கலாம்.

10. படுக்கப் போகும் முன் பத்து நிமிஷமாவது அம்மா, அப்பா, அண்ணண், தங்கை யாருடனாவது பேசவும் (பேசுவது என்று சொன்னவுடன் காதலியுடன் என்று நினைக்க வேண்டாம், நான் சொன்னது குடும்பத்தினருடன் மட்டும்). எதாவது ஒரு அறுவை ஜோக் அல்லது காலேஜில் நடந்த நிகழ்வுகள். சப்ஜெக்ட் முக்கியமில்லை. பேசுவது தான்.

இந்த பத்தில் தினம் ஒன்று என்று முயற்சி செய்து தான் பாருங்களேன்.

(நான் எட்டாவது கட்டலையை உடனடியாகச் சிரமேற்கொள்ள முடிவு செய்திருக்கிறேன்.)

நான் fridge வாங்கிய கதை

January 5, 2011

என் வீட்டில் குளிர்பதனப் பெட்டி (refrigerator) பழுதடைந்து விட்டது. மராமத்துப் பார்ப்பவர் வந்து பார்த்துவிட்டு “ஒரு ரெண்டுலேர்ந்து மூவாயிரம் ஆகும் சரிபண்ண” என்றார். இதென்னடா வம்பு வருஷக் கடைசியில் என்று எண்ணிக்கொண்டு பழம்பொருள் பாதுகாப்பு வித்தகரான என் தந்தைக்குச் சொல்லிவிட்டு புதுசு வாங்கலாம் என்று அவருக்குத் தொலை பேசினேன். உரையாடல் இதோ:

என்னப்பா சொல்றே, fridge ஓடலியா?

குளிரலை. அப்பப்போ குளிரும், அப்பப்போ குளிராது.

என்ன செஞ்சே அதை?

தேவைப்படும் போது  திறந்து மூடினேன், பொருளை உள்ளே வெச்சு எடுத்தேன்.

ஏலேய்! திடீர்னு ஓடாம போச்சுன்னா என்ன ஆச்சுன்னு கேட்டேன். திறந்தானாம், மூடினானாம். இந்தா உங்கம்மாட்டயே பேசு!

“என்னப்பா, fridge ஓடலியா?”

“ஓடும். ஆனா அப்பப்போ குளிராது. ரிப்பேர் பாக்க 2000 ஆகுமாம். பேசாம போட்டுட்டு புதுசு வாங்கிடலாம்.”

“ஹரிஹரய்யர் என்ன சொன்னார்?”

“உங்கிட்ட பேசச் சொன்னார்”

“என்னமோ என் பேச்சக் கேட்டுத்தான் எல்லாம் நடக்கற மாதிரி!”

“I dunno, Mom!”

“அவர்கிட்டயே சொல்லு”

ஆங்.. வாங்கி ஒரு 4 வருஷம் இருக்குமாப்பா?

ம்..

இதப் போட்டா எம்புட்டுக்கு எடுப்பான்?

500 ரூபாய்!

டேய்! 8500க்கு வாங்கினது. சரி… Electronic item, கழுத அம்புட்டுத்தான்.. போட்டுட்டு வாங்கிடலாம்ங்கறியா?

போடாமலும் வாங்கலம்பா! ஆனா பழசு வீட்ல எடத்த அடைக்கும்!

சரீ! நம்ம ராஜா எதோ Electronic கம்பெனில தானே இருக்கான்?

ஆமாம்.

அவனக்கேளு! பழசுக்கு புதுசு மாத்தி மீதி பணம் கொஞ்சம் கட்டுப்படியாகற மாதிரி ஏதாவது பண்ண முடியுமான்னு பார்! 25000க்கு வாங்கி 2 நாள்ல திருப்பித் தந்தாலும் நாலணாக்கும் எட்டணாக்கும் தான் எடுக்கறான் இந்தக் காலத்துல. போறது போ. புதுசு வாங்கிடு.

ஹ்ம்ம்ம்….. சரிப்பா… நான் ஏற்கனவே பேசிட்டேன். 9000 கிட்ட ஆகும்.

நாலு எடத்துல கேளு மொதல்ல. சும்மா ஒருத்தனக் கேட்டுட்டு ஒடனே வாங்கிடப்படாது.

Advise noted with due respect, Sir.

கடவுளே! நீர்காத்த ஐயனாரே!! சரணம் ஐயப்பா!!! போனை வெச்சுடறேன். பாத்துச் செய்!

நானா அவரா?

பாத்துச் செய்ன்னு ஒன்னத் தாம்பா சொன்னேன்!

Okay, Dad!

இந்த ராஜா என்கிற ராமசாமிக்குப் போன் போட்டு விஷயத்தைச் சொன்னேன். அவர் அந்த show roomல் கணக்குப் பிள்ளையாக இருக்கிறார். எங்க கடையில வாங்கலாம். நாங்க எப்படி service கொடுப்போம் தெரியுமா என்றார். Finance வேண்டுமென்றால் என்ன செய்யவேண்டும் என்றேன். இருக்கிற ஆவணங்களை எல்லாம் கொண்டா பார்த்துக் கொள்வோம் என்றார்.

Nope. Gimme proper details என்றேன்.

யாரிடமோ கேட்டுச் சொன்னார். (அப்புறம் இது சொட்டை அது நொட்டைன்னு சொல்லமாட்டியே என்று உறுதிப்படுத்திக் கொண்டு தகவல் தந்தார்.) மீண்டும் கடைப்புராணம் பாடினார். என்னிடம் மீட்டருக்குச் சூடு வைக்கமாட்டார் என்பதால் போனேன். மாலை 6.30 மணி. குளிர்பதனப் பெட்டியைப் பார்த்துவிட்டு விலை கேட்டேன். விலை சொன்னதும் கிண்டி ரேசில் ஓடுமா இந்தப் பெட்டி என்ற கேள்வியை அடக்கிவிட்டு ராமசாமியிடம் சொன்னேன்.

விலை குறித்திருந்த சிட்டையை வாங்கிக் கொண்டு முதலாளியம்மாவிடம் போனார். ரகசியமாக ஏதோ பேசினார். கணிசமாக விலை குறைத்தார் அந்த முதலாளியம்மா. இலவச இணைப்புகள் வேறு இருக்கிறது என்றார். (அரசாங்கமா நடத்துகிறார் இந்தப் பெண்மணி என்ற கேள்வியை மிகுந்த சிரமப்பட்டு அடக்கிக் கொண்டேன்! கிடையாது போ என்று சொல்லிவிட்டால்?)

இந்த ராமசாமியும் நானும் அவரவர் பணியிடத்தில்  நடப்பவை பற்றி ஓரளவுக்குப் பரிமாறிக் கொள்வோம். இந்தக் கடையில் சேர்ந்ததில் இருந்தே ஒரே முதலாளியம்மா புராணம். நடக்கும் சில தவறுகள் அதற்கு விழும் திட்டுகள் பற்றியும் சொல்வார். முதலாளியம்மா மிகுந்த கண்டிப்பானவர், நல்ல புத்திசாலி என்று புகழ்வார். (அம்பாள் உபாசகர் என்பதால் அவருக்கு அந்தப் புகழ்ச்சி நன்றாகவே வந்தது.) ஆகவே பார்த்திரா விட்டாலும் அந்த மனிதர்கள் பற்றிய பரிச்சயம் மனதுக்கு இருந்தது.

Finance Option வேண்டும் என்றேன். ஒரு இளைஞனைக் காட்டினார்கள். அவர் பேசுவார் என்றார்கள். பேசினார். பேசினார். மேலும் பேசினார். சில அடிப்படைக் கேள்விகளைக் கேட்டேன். அது அப்படித்தான் சார். Finance எடுத்தால் அப்படித்தான் வரும் என்றார்.

கோனார் தமிழ் உரை இதோ:

இது என்ன 194 ரூபாய் கணக்கு?

சார்!  இது எல்லாத்துக்குமே சரியான கணக்கு இருக்கு சார்! 2.25% வட்டி சார்.

அப்போ 0%ங்கிறது என்ன?

அது உண்டு சார், ஆனால் 2.25% வரும் சார்!

Boss! 0% வட்டின்னா 2.25% என்ன? 2.25 % வட்டின்னா 0% என்ன?

சார் அது கணக்கு சார். Finance கொடுக்கும் போது 194 ரூபாய் வாங்குவோம் சார். எல்லார் கிட்டயும் வாங்குவோம்.

0%னு சொல்றீங்க. அப்புறம் 2.25% வட்டி ஏன் போடறீங்க?

சார். 0% தான் சார். நான் உங்களை ஏமாத்தலை சார். இது எல்லாமே சரியான கணக்கு தான் சார்! 2.25% சார்ஜு சார்!

(வாழைப்பழ காமெடியில் கவுண்டமணி ஏன் கோபமானார் என்பதை உணர்ந்த தருணம் இது.)

அது வந்து DB சார்!

DBன்னா?

சார்ஜ் சார்! இது எல்லாத்துக்கும் கணக்கு இருக்கு சார்!

DBக்கு அர்த்தம் சொல்லுங்களேன்!

டாக்குமெண்ட்டுக்காக வாங்குறது சார்!

சற்றே நிதித்துறை வழக்கங்கள் அறிந்ததனால் புரிந்தது. DB அல்ல அது DP (Document Processing) சார்ஜ் என்பது என் அனுமானம்.  என் அலுவலகத்தில் அனுமானங்களை வைத்து யாராவது முடிவுகள் சொன்னால் எனக்கு முதலில் வருவது கோபம். “Assumption is the mother of all goof ups. Would you mind getting the facts? Only then we can get the real picture,  then decide accordingly.” என்பதே என் எதிர்வினை. இங்கே நான் அனுமானத்தின் அடிப்படையில் ஒரு முடிவை ஏற்றேன். (விதி யாரை விட்டது!)

Bக்கும் Pக்கும் வேறுபாட்டை விளக்க நான் என்ன வீட்டாவில் வாத்தியார் வேலையா பார்க்கிறேன்! ஆனால் BP சற்றே எகிறியது என்னவோ உண்மை.  Approval  வர வேண்டும், 10 நிமிடங்கள் ஆகும் என்றனர். சற்றே ரிலாக்ஸ் ஆக கிரிக்கெட் பார்த்தேன். கால்லிஸ் நன்றாக விளையாடிக் கொண்டிருந்தார். 20 நிமிடங்கள் கழித்து மும்பையில் இருந்து ஒரு பெண் தொலை பேசினார்.

நிதி கேட்டிருந்தீர்களா?

ஆமாம்.

என்ன வாங்குகிறீர்கள்?

fridge.

எங்கே வேலை செய்கிறீர்கள்?

சொன்னேன்.

சம்பளம் எவ்வளவு?  (ஆண் மகனிடம் கேட்கக்கூடாத கேள்வி)

எந்த வங்கியில் கணக்கு இருக்கிறது? (ரத்த வங்கி தவிர 3)

போன் பில் மாதம் எவ்வளவு வரும்? (அதற்கும் நீங்கள் பணம் தருவீர்களோ?)

மணமானவரா? (இல்லை. Your voice sounds nice, Babe!)

(விட்டால் காலையில் பல் துலக்குவீர்களா? என்ன பற்பசை என்றெல்லாம் கேட்பார்களோ?)

ஒரு வழியாக Approval வந்தது!

(இப்போது நம்ம finance guy மறுபடியும்.)

நீங்க பேச்சுலரா சார்?

ஆமாம்.

அப்ப இந்த address proof செல்லாது சார்! Latest Bank statement வேணும்.

Do what now? எல்லா மாசமும் இதே Bank தானே statement தரும்?

இல்ல சார். மேரீட் ஆளுங்கன்னா பிரச்சினை இல்ல சார். பேச்சிலர்னா லேட்டஸ்ட் அட்ரஸ் ப்ரூஃப் வேணும் சார்.

(டைவர்ஸ் ஆனவனுக்கு வேற தனியா சட்டதிட்டம் வெச்சிருக்கீங்களோ?)

மெயில்ல இருக்க்கா பார்க்கணும்.

இங்கயே மெயில் செக் பண்ணுங்க சார்!

உள்ளே போனேன். ராமசாமி சொந்தக்காரன் என்பதால் இந்தச் சலுகையும் கிடைத்ததா தெரியவில்லை. (அவரிடம் கேட்டால் காலரைத் தூக்கிவிட்டுக் கொள்வார் என்பதால் கேட்கவில்லை.) மின்னஞ்சல் பார்க்கையில் அங்கு நடக்கும் செயல்பாடுகளை சற்றே அவதானித்தேன். (Occupational Hazard). தவறுகள், அவற்றின் காரணிகள் ஒவ்வொன்றாய் மனதில் பதிந்தன. இதை இப்படிச் செய்யலாமே அதை அப்படிச் செய்யலாமே என்று Lean, Process Improvement பணிகள் செய்யும் பழக்க தோஷத்தில் மனம் suggestionகளை அள்ளித் தந்தது.

அடங்குடா! இது நீ வேலை செய்யும் இடமில்லை, என்று மனதை அடக்கிக் கொண்டு, மின்னஞ்சலில் Bank statement இல்லை என்று ஏமாந்து, நாளை தரட்டுமா என்று கேட்டேன். சரி என்றார்கள்.

வேறு என்னென்ன வேண்டும்?

PAN card ஜெராக்ஸ்.

வேற?

வேறு எதுவும் தேவையில்லை சார்!

Sure?

இது மட்டும் தாங்க போதும்.

Ogay! thanks much, buddy!

முன் பணம் கட்டச் சொன்னார்கள். பில் போட்டு வந்தது. Debit card கொடுத்தேன். அதை அந்த முதலாளியம்மா தேய்க்கப் போன போது ஒருவர் ஓடிவந்தார். மேடம் பில்லுல ஏதோ மாறிப் போச்சாம், கொஞ்சம் இருங்க, வேற பில்லு வருது என்றார். மறுபடியும் பிரச்சினையா என்று மனதில் வடிவேலு கூவ  கெக்கெக்கே என்று சிரித்து விட்டேன். ராமசாமியின் முதலாளியம்மா கோபமானார். சாரி சார் என்று என்னிடம் வருந்திவிட்டு வேகமாய் உள்ளே போனவர் அவர்களைச் சத்தமாய்த் திட்டினார்.

பிறகு வந்தார். பில் வந்தது. பணம் தேய்த்துவிட்டு அன்பளிப்பு கைக்கடிகாரத்தைப் பெற்றுக் கொண்டேன். நன்றி நவின்றுவிட்டு வெளியே வந்தேன். மணி 9.15 pm. ராமசாமி கூடவே கிளம்பினார். நான் சிரித்தது சொல்லி அது கோபத் தூண்டலானதையும் சொன்னேன். “ரொம்ப சந்தோஷம்! நம்மாளு பில்லுல தகராறு. சும்மா இருக்க மாட்டானேன்னு பாத்தேன். நக்கலா ஏதாவது சொல்லி வைக்கப் போயி, அதுல எங்க மேடம் டென்ஷன் ஆயிட்டாங்களோன்னு கொஞ்சம் பயந்தேன்” என்றார். சாப்பிட்டுவிட்டு வீடு  வந்து சேர்ந்தேன்.

உறங்கும் முன் அன்றைய நிகழ்வுகளை அசை போடுவது வழக்கம். அப்போது அந்தக் கடையில் பில்லில் தகராறு என்றதும் சிரித்தது தேவையற்ற செயல் என்று தோன்றியது. அந்தப் பெண்மணியை ஏளனப்படுத்துவது போன்ற சிரிப்பு. அதனால் தான் கோபமானார். சரி, ராமசாமியிடம் பேசிவிட்டு சரியான சந்தர்ப்பம் பார்த்து வருத்தம் தெரிவித்து விடலாம் என்று முடிவு செய்து உறங்கிவிட்டேன்.

மறுநாள் காலையில் latest bank statement ப்ரிண்ட் எடுத்தேன். ராமசாமியிடம் கொடுத்துவிடலாம் என்று அவர் வீட்டுக்குப் போனால் மனிதர் முகத்திலிருந்து கைக்குட்டையை எடுக்கவேயில்லை. (பள்ளிக்காலம் என்றால் மூக்கொழுகி ராமசாமி என்று பட்டப் பெயர் வைத்துச் சிரிக்கலாம். இப்போது சிறுபிள்ளைத் தனமாக இருக்குமே!) நானே கொண்டு போய்க் கடையில் கொடுத்தேன்.  மாலைக்குள் fridge  வந்து சேரும் என்றனர். வேறு ஏதாவது தேவையா என்றேன். இல்லை என்றார் நம்ம finance guy.

ATM கார்டு காப்பி வேணுமா? பொதுவா கேப்பீங்களே!

இல்ல சார். அது வேண்டாம்  சார்.

Okay! fridge எப்ப வரும்.

இன்னிக்கி ஈவ்னிங்குள்ள வந்துரும் சார்!

Thank you!

மயிலையில் உறவினர் ஒரு மூதாட்டி மருத்துவமனையில் அனுமதிக்கப்பட்டு இருந்தார். பார்ப்பதற்கு போனேன். அடையாறு தாண்டும் போது செல்பேசி பாடியது. எடுத்துப் பேசினேன்.

சார், LGலேர்ந்து பேசறோம். இப்ப வந்து document கொடுத்தீங்களே!

ஆமாம்.

ஏரியா பக்கத்துல தான் இருக்கீங்களா சார், இல்ல தூரமா போயிட்டீங்களா?

ஏன்? (என்ன பஞ்சாயத்து இப்ப?)

ATM கார்டு ஜெராக்ஸ் வேணும் சார்.

கேட்டப்ப வேண்டாம்னு சொன்னீங்களே!

உங்ககிட்ட பேசுனவரு ஃப்ரஷர் சார். அவருக்கு சரியா தெரியாது! சாரி சார்.

சரி! டெலிவரி தரும் போது அதை வாங்கிக்கங்களேன்?

முடியாது சார்! அது இருந்தா தான் லெட்டர் தருவாங்க. லெட்டர் வந்தா தான் fridge தரமுடியும்.

(The deal is off. Pay my money back என்று கோபத்தில் வந்ததை அடக்கினேன்.)

மாலை தருவதாகச் சொன்னேன். முடியவில்லை. மறுநாள் கொடுத்தேன். அன்று தான் (மூன்றாவது நாள்) புது fridge வந்தது. பழைய பெட்டியை எடுத்துப் போக வேண்டுமே என்ற போது அவர்கள் பில்லில் அது பற்றி ஏதும் குறிப்பிடவில்லை என்றனர்.

(பில்லிங்கில் அது வேறு தகராறா?)

பின்னர் கடையைக் கூப்பிட்டுப் பேசினேன். Exchange இருக்கா சார்! (ஓஹோ), சொன்னீங்களா சார்! (சூப்பர்), சரி அவங்க எடுத்துப்பாங்க சார் என்றனர்.

(ஆக, நான் சிரித்தது சரிதான் போலிருக்கே!! வருத்தமெல்லாம் தெரிவிக்க வேண்டாம், போ!)

ஒரு வழியாக பழையது கழிந்து புதியது புகுந்தது. ஹர ஹர சிவ சிவ பழைய பரமசிவனே! போற்றி போற்றி!!

குஷிமிகு குஜராத்!

December 30, 2010

Business India ஜனவரி 9, 2011 தேதியிட்ட இதழைப் படித்துக் கொண்டிருந்த் போது “குஜராத்: வணிகத்தின் கனவு இலக்கு” என்று ஒரு கருத்தாய்வு படித்தேன். (அது பற்றிப் பிறகு சொல்வேன்) நிஜமாகவே தமிழகம் அப்படி வராதா என்ற ஏக்கம் ஏற்பட்டது.  நரேந்திர மோடி நல்லபடியாக ஆள்கிறார் என்று சொன்னாலே வடிவேலு மாதிரி “அவனா நீயி?” என்று கேட்கும் தமிழக அறிவுஜீவிகள் இதை செரிக்கத் திணறுவார்கள். ஜெயலலிதாவின் 2001-06 ஆட்சி நன்றாக இருந்தது என்று சொன்னாலே சொன்னவரையும் அவரையும் சாதி சொல்லித் திட்டும் பகுத்தறிவுப் பெட்டகங்கள், மோடியை எப்படி ஏற்பார்கள் .

கோடிகளில் கொள்ளை அடித்தவர்களையும் சாதி சொல்லிக் காப்பாற்றத் துணியும் பகுத்தறிவுப் புலிகளையே பார்த்துப் பழகிய நமக்கு இப்படி ஒரு முதல்வர் என்பது ஆச்சரியம்தான். இந்தியாவில் இப்படி ஒரு வளர்ச்சிப்பணி ஆற்றும் முதல்வர் என்பது குறித்துப் பெருமைப்பட்டாலும், தமிழகத்தில் இப்படி இல்லை என்பது பொறாமை தருகிறது. (ஜெ.  20011ல் மீண்டு(ம்) வந்து விட்டதைப் பிடிப்பார் என நம்பலாம்!)

24 மணிநேரம் மின்சாரம் இருக்கிறது. (அப்படின்னா?) விவசாயம் செழிக்கிறது. (ஓஹோ?) அது கிடக்கட்டும். கோத்ராவில் மோடி பலரைக் கொன்றார் தெரியுமா என்பர். தீஸ்தா செதல்வாட் போராடுகிறாரே தெரியுமா என்பர். அவர்கள் சில நாட்டு நடப்புகளை வசதியாக மறப்பர் அல்லது மறைப்பர்.

சமீபத்தில் உச்சநீதிமன்றத்தில் சமர்பிக்கப்பட்ட சிறப்பு புலனாய்வுக் குழு அறிக்கை கோத்ரா கலவரத்திற்கு நரேந்திர மோடி  காரணமில்லை என்று தெரிவித்திருக்கிறது.  அவர் தமது அரசியல் சாசனக் கடமைகளில் இருந்து வழுவி மக்களைக் காக்கத் தவறிவிட்டார் என்ற குற்றச்சாட்டுக்கு  குற்றத்தில் சிக்கவைக்கும் பொருண்மைகள் போதுமான அளவில் இல்லை என்பது சிறப்பு புலனாய்வுக் குழு கண்டு சொல்கிற உண்மை.

இதை உண்மை என்று எப்படிச் சொல்வாய்? மோடி செய்யவில்லை என்பதை நீ நேரில் பார்த்தாயா என்று கேட்போர் நிற்க.  சிறப்பு புலனாய்வுக் குழு நரேந்திர மோடியை மணிக்கணக்கில்  விசாரித்த பிறகே அறிக்கை அளித்தது. உச்சநீதிமன்றத்தின் கண்காணிப்புக்கு உட்பட்ட சிறப்பு புலனாய்வுக் குழு தீர விசாரித்துச் சொன்ன செய்தியில் பொய் இருக்க வாய்ப்பே இல்லை.

தவிரவும், குஜராத் கலவரம் தொடர்பான சிறப்புப் புலனாய்வு நீதிமன்றத்தில் பல கற்பனைப் புனைவுகள் கலவர நிகழ்வுகள்  என வாக்குமூலங்களாக வரிசைகட்டி வருகின்றன. இந்த வழக்கில் தீஸ்தா செதல்வாட் ஜாவேத் என்கிற சமூக சேவகி அம்மையார் மிகவும் தீவிரமாக இறங்கி வேலை செய்கிறார். அவர் ஒரு தொண்டு நிறுவனமும் நடத்துகிறார். நன்கொடைகள் தாராளமாக வரிவிலக்கெல்லாம் காட்டி வாங்கிக் கொள்ளவும் செய்கிறார்.

அவர் செய்யும் தொண்டு பாதிக்கப்பட்டவர் என்று நீதிமன்றத்தில் நிறுத்துவோர் பெயரில் இவரே இட்டுக்கட்டிய கொடூரக் கொலைக் கதைகளைக் (cooking up macabre tales of killings) கலவர நிகழ்வுகள் என்று பிரமாண வாக்குமூலமாக சமர்ப்பிப்பது. தொண்டு நிறுவனம் என்பதால் ஏதாவது உதவி கிடைக்காதா என்ற எதிர்பார்ப்பில், “கடையை எரிச்சுப்புட்டங்க, வீட்டைக் கொளூத்திப்புட்டாங்க, உதவி செய்யுங்கம்மா!” என்று வருவோரிடம் பேர் ஊர் முகவரி எல்லாம் வாங்கிக் கொண்டு,அவர்களிடம் வெற்றுத் தாட்களில் கையொப்பமும் பெற்று, “துள்ளத் துடிக்கக் கொலை செய்தார்கள், கதறக் கதற கற்பழித்தார்கள், அவர்கள் எல்லோரும் நரேந்திர மோடியின் ஆட்கள், நான் பயத்தால் பார்த்துக் கொண்டு மட்டுமிருந்தேன்” என்கிற வகையில் எழுதி நீதிமன்றத்தில் அவர்கள் பெயரில் பிரமாண வாக்குமூலம் சமர்ப்பித்திருக்கிறார்.
(http://www.dailypioneer.com/281457/%E2%80%98Teesta-drafted-affidavits-didnt-divulge-contents.html)

பலருக்குத் தங்கள் பெயரில் சமர்ப்பிக்கப்பட்ட வாக்குமூலத்தில் என்ன எழுதியிருக்கிறது என்பதே தெரியவில்லை. அப்படிக்  ‘கலவரத்தில் பாதிக்கப்பட்டோரை’ விசாரித்த போது உளறிக் கொட்டி, கடைசியில் வாக்குமூலத்தைப் பற்றி தமக்கேதும் தெரியாது என்றும் ‘அந்தம்மா’ சொன்னதைத் தான் தாங்கள் சொல்வதாகவும் கூறியுள்ளனர். என் பெயரில் எப்படி இல்லாத கதைகளைக் கட்டுவாய் என்று சிலர் உச்ச நீதிமன்றத்தில் இந்த சமூக சேவகி அம்மையார் வழக்குத் தொடர்ந்துள்ளனர்.

தீஸ்தா அம்மையாரிடம் உதவியாளராய் வேலை பார்த்த ரயிஸ்கான் பதான் என்பவர் தமக்குத் தெரியாமல் தம் பெயரில் தீஸ்தா அம்மையார் இ-மெயில்களை அனுப்பியும் பெற்றும், தம் பெயரில் மேற்கூறிய மோசடிகளைச் செய்ததாக சிறப்புப் புலனாய்வு அதிகாரியிடம் வாக்குமூலம் அளித்துள்ளார்.

அறிவு ஜீவிகள் பலர் செதல்வாட் அம்மையாருடன் சேர்ந்து ஓய்வு பெற்ற நீதிபதிகள் சிலரை வைத்து “கவலைகொண்ட மக்கள் தீர்ப்பாயம் (Concerned Citizens Tribunal)” ஒன்றை அமைத்து, “சமர்ப்பிக்கப்பட்ட சாட்சி ஆதாரங்களின் அடிப்படையில் சங்பரிவார் அமைப்பினர் குற்றமிழைத்தனர். நரேந்திர மோடி கலவரத்திற்குத் திட்டம் தீட்டி, குற்றவாளிகளுக்குத் தலைமை தாங்கினார்” என்று தீர்ப்பளித்தனர்.

இது அம்மையாரின் தொண்டு நிறுவனத்தின் சாதனைகளில் ஒன்றாக அவர்களின் இணைய தளத்தில் குறிப்பிடப்பட்டுள்ளது. அது காட்சிப்பிழை என்பதும், சமர்ப்பிக்கப்பட்ட சாட்சி ஆதாரங்கள் செதல்வாட் அம்மையார் சமைத்துத் தந்தவை என்பது இப்போது தெரிய வருகிறது.

ஆக ஊடகங்கள் பதிவு செய்தவை உண்மைக்குப் புறம்பான கட்டுக்கதைகள் என்பது தற்போது வெளிச்சத்துக்கு வந்துகொண்டிருக்கிறது. அறிவுஜீவிகள் அவசரப்பட்டு விட்டார்கள் என்பதுவும் புலனாகிறது. Some vested interests are striving so hard to keep the people and truth in dark என்பது ஐயம். தீஸ்தா அம்மையார் கூறும் குற்றச்சாட்டுகள் திரிபற்றவை என்று தெளிவாகும் வரை இந்த ஐயம் தொடரும்.

தற்போது நீதிமன்றத்தில் தீஸ்தா அம்மையாரால் பதிவு செய்யப்பட்ட நிகழ்வுகளின் நம்பகத்தன்மையே கேள்விக்குறி, அடிப்படையே அடுக்கப்பட்ட பொய் எனும் போது கிட்டவோ தட்டவோ அவற்றை ஏற்பது இகழ்ச்சி.

(இது குறித்து நான் தமிழ் பேப்பர், தமிழ் ஹிந்து ஆகிய தளங்களிலலிட்ட பின்னுட்டங்களில் தட்டெழுதிய சில வாசகங்கள் அப்படியே இங்கிருக்கும். )

என் கேள்வி:

நரேந்திர மோடி குஜராத்தை 9 ஆண்டுகள் ஆண்டு மாநிலத்தின் பொருளாதார, வாழ்க்கைத்தர வளர்ச்சியில் சாதனை படைத்திருக்கிறார். ச்.  மத்திய அரசு எதிர்க்கட்சி, ஊடகங்கள் அவரை நிரந்தரக் குற்றவாளி என்கின்றன. இருப்பினும் மாநில மக்கள் நலன் முன்வைக்கப்பட்டு மிகவும் சிறப்பாகச் செயல்படுகிறார் மோடி.

கருணாநிதிக்கு இந்தத் ‘தகுதி’ எதுவுமே இல்லை. மத்திய் அரசில் 12 ஆண்டுகளாகப் பங்கு வகிக்கிறார். குற்றச்சாட்டுகள் இருக்கின்றன, ஆனால் வழக்கு விசாரணை எல்லாம் மருந்துக்குக் கூடக் கிடையாது.  ஊடகங்கள் அவரை பாசம் நேசம் இவையெல்லாம் மிகுந்து போற்றுகின்றன. 50 ஆண்டுகால அரசியல் அனுப்பவம் வேறு. நிர்வாகத்தில் சூரப்புலி என்று பெயர் பெற்றிருக்கிறார்.

ஆனாலும் தமிழகம் எந்தக் கருத்தாய்விலும் முதலிடம் பெறவில்லையே ஏன்? நமக்கு நாமே திட்டம் தான் இதற்கு ஒத்துவருமோ?

படித்ததில் பிடித்தது!

December 28, 2010

கருப்பும் ஒரு கலர்…

வெள்ளையும் ஒரு கலர்…
ஆனால் ப்ளாக் & வொய்ட் டி.வீ. என்பது ஒரு கலர் டி.வீ. இல்ல….
என்ன கொடும சார் இது…….
________________________________________________________

நான் உங்களிடம் ஒரு கல் கேட்டேன்….
ஒரு சிலையே கொடுத்தீர்கள்..
ஒரு இலை கேட்டேன்.. ஒரு மலரையே கொடுத்தீர்கள்…
என் கண்ணீரை துடைக்க ஒரு கைகுட்டைக் கேட்டேன்… நீங்களோ உங்கள் கையைக் கொடுத்தீர்கள்…
உண்மையாகவே நீங்கள் ஒரு செவிடு…….

________________________________________________________

ராமசாமி:தலைவர் நாத்திகரா இருக்கிறது தான் பிரச்சினையே!
குப்புசாமி:ஏன்?
ராமசாமி: ஏழையின் சிரிப்பில் இறைவனைக் காணலாம் அப்படிங்கிறதால ஏழைகளுக்கு சிரிப்பே வராதபடி விலைவாசியை ஏத்திட்டாரே!!

________________________________________________________

இவை சொந்த சரக்கு அல்ல. ஆகவே காப்பிரைட் உரிமை என்னுடையதல்ல. நான் படித்தவற்றில் பிடித்த சில இவை.

ஆம்வே – வெள்ளையும் சொள்ளையுமா ஒரு கொள்ளை

December 27, 2010

இந்தப் பதிவு மிகவும் பயனுள்ளதாக இருக்கிறது. ஆம்வே ஜாக்கிரதை!!
http://thoppithoppi.blogspot.com/2010/12/amway.html

மன்மதன் (இந்துமுன்னணி) அம்பு!

December 27, 2010

சமீபத்தில் வெளியாகி ‘ஓட்டமாய் ஒடிக்கொண்டிருக்கும்’ மன்மதன் அம்பு திரைப்படத்தில் இடம் பெற்ற இந்துக்களின் மத உணர்வினைப் புண்படுத்தும் பாடல் குறித்த சர்ச்சை இன்னும் தீரவில்லை. இந்து மத உணர்வுகளைப் புண்படுத்தும் விதத்தில் இருந்த அந்தப் பாடல் குறித்து இந்து அமைப்புகள் கண்டனம் தெரிவித்தன.

இந்நிலையில் கமல்ஹாசன் தயாரிப்பாளருக்குப் பிரச்சினை வேண்டாம் என்பதால் அந்தப் பாடலை நீக்குவதாக ஒரு கடிதம் வெளியிட்டுள்ளார். தமிழகத்தில் மட்டுமே அந்த கொச்சைப் பாடல் இல்லாது படம் வந்துள்ளது, வெளிநாடுகளில் அந்த அபாசப் பாடலுடனேயே படம் வந்துள்ளது என்று வெளிநாட்டில் வாழும் பலர் தெரிவிக்கின்றனர்.

இந்தப் பாடல் சம்பந்தமாக கமல் வெளியிட்டுள்ள கடிதத்தில் நிஜ ஆன்மீக வாதிகளை இது புண்படுத்தாது என்றும், ஆனாலும் இது உதயநிதி ஸ்டாலின் படம் என்பதாலும் எல்லா மதத்தவரும் படம் பார்க்க வரவேண்டும் என்பதாலும் மட்டுமே இதைத் தாமாகவே முன்வந்து நீக்குவதாகவும் கூறியுள்ளார்.

சென்சார் போர்டு ஓகே சொல்லிவிட்டது. இந்துக்களின் எதிர்ப்புக்கெல்லாம் நான் அஞ்ச மாட்டேன். நான் பகுத்தறிவுவாதி என்று மார்தட்டிய கமலஹாசன் திடீரென்று இப்படி பல்டி அடிக்கவேண்டிய அவசியம்  என்ன?

இந்தப் பாடல் பற்றிய ஊடகச் செய்திகளை வைத்துப் பார்க்கும்போது, ஓரிரு இந்து அமைப்புகள் வெளியிட்டுள்ள கண்டனத்தைத் தவிர, வேறு பெரிய எதிர்ப்பு ஏதும் தெரியவில்லை. மற்றபடி ஊடகங்களில் இந்தப் பாடல் பற்றி எதிர்மறையான செய்திகள் எதுவும் வெளியாகவில்லை. கமல் தனது முடிவில் இருந்து பின்வாங்குவதாக இல்லை என்று கூறி மேடை மேடையாக இந்தப் பாடலைப் பாடிக் காட்டினார்.

படம் எடுக்கும் தயாரிப்பாளர் துணை முதல்வரின் புதல்வர். போராட்டம், எதிர்ப்பு கோஷம் எல்லாம் இவர்களிடம் எந்த அளவு செல்லுபடியாகும் என்பது யாவரும் விடையறிந்த ஒரு கேள்வி! இதுவரை கமலஹாசன் படங்களுக்கு வந்த இந்து மத எதிர்ப்புகளை விட இந்த எதிர்ப்பை ஏன் சக்திவாய்ந்ததாக கமலஹாசன் கருதவேண்டும்?

இது குறித்து தமிழ்ஹிந்து தளத்தில் ஒரு காணொளியுடன் கூடிய பதிவு வந்தது. அதில் இந்து முன்னணியினர் பாடலை நீக்க என்ன செய்தனர் என்பது தெளிவாக இருக்கிறது.

20.12.2010 அன்று கமலஹாசனின் அலுவலகம் முன்பு இந்து முன்னணியினர் முற்றுகைப் போராட்டம் அறிவித்தனர். அறிவிப்பின்படி சுமார் 150 பேர் கமலஹாசனுடையஅலுவலக வாசலில் கூடினர். போராட்டம் துவங்க இருந்த நிலையில், கமலஹாசன் தரப்பில் இருந்து பேச்சுவார்த்தைக்கு அழைப்பு வந்திருக்கிறது. பேச்சுவார்த்தையைத் தொடர்ந்து, ஆபாசமான பாடலைத் தாமாகவே முன்வந்து தயாரிப்பாளருக்கு வரும் நஷ்டத்தைத் தவிர்ப்பதற்காக படத்தில் இருந்து நீக்குவதாக கமலஹாசன் கடிதம் வெளியிட்டார்.

இந்துமுன்னணியினர் படம் ஓடினாலும் ஓடவில்லை என்றாலும் எதிர்பார்த்த இலாபம் வராது என்று கூறியுள்ளனர். தொழில்நுட்பம் கொண்டு படத்தை எதிர்ப்போம் என்றும் எச்சரித்துள்ளனர். அப்படியானால் அழுத்தம் எங்கே தரப்பட்டுள்ளது என்று பார்ர்கும் போது வணிகம் சார்ந்த அழுத்தம் அது என்பது புரிகிறது.

இந்தச் சூழலில் தான் உதயநிதி படத்தின் விநியோக உரிமையை வேறொரு நிறுவனத்துக்கு விற்றுள்ளார். விற்றதற்கு அரசியல் காரணங்கள் பல இருப்பினும் தன் நிறுவனமான சிவப்பு அரக்கனுக்கு (Red Giant) பாதிப்பில்லாமல் போனது என்று அவர் போய்விட்டார்.

ஒரு 150 பேர் கொண்ட கூட்டத்தை ஒன்றுமில்லாமல் செய்யும் அளவு கூட அரசியல் செல்வாக்கு தயாரிப்பாளர் உதயநிதி ஸ்டாலினுக்கு இல்லாமலா போய்விட்டது? சண்டியருக்கு 2003ல் சிக்கல் வந்த போது அன்றைய முதல்வர் ஜெயலலிதாவிடம் போய் முறையிட்ட கமலஹாசன், தற்போதைய முதல்வர் பகுத்தறிவுச் சிங்கம் கருணாநிதியிடம் ஏன் போகவில்லை?

மற்றவர் பாதிக்கப்படக் கூடாது. என் படம் என்றால் நடப்பதே வேறு என்று கமலஹாசன் பேசுவதும் வாய்ச்சொல் வீரமே என்பது சண்டியர் விருமாண்டியான கதையில் சந்தி சிரித்தது. அன்றைய முதல்வர் ஜெயலைதாவைச் சந்தித்து முறையிட்டு அவர் பாதுகாப்புக் கொடுத்தும் அடித்துப் போட்டுவிட்டால் என்ன செய்ய என்று அஞ்சிச் சண்டியரை விருமாண்டியாக மாற்றினார் இந்தப் பகுத்தறிவு வியாபாரி.

இந்த காணொளி அவர் எப்படியெல்லாம் பல்டி அடித்துப் பணிந்தார் என்பதை விளக்குகிறது.

இதிலிருந்து நாம் அறிந்து கொள்ளவேண்டியது, விற்பனை பாதிக்கும் என்றால் அந்தச் சரக்கைத் தூக்கி எறிய கமல் தயங்க மாட்டார். அவருக்கு முக்கியம் படம் வியாபாரம்  ஆக வேண்டும், அவ்வளவே! தமது உயிரினும் மேலான கொள்கையைச் சந்தையையும் அதைப் பீடிக்கும் காரணிகளையும் பொறுத்து மாற்றிக் கொள்ளத் தயங்கமாட்டார் கமலஹாசன் என்பதே இதன் மூலம் நமக்குத் தெரியும் செய்தி.

ஈழத்தின் அவதியும் தமிழகத்தின் அசதியும் – I

December 26, 2010

ஈழத்திற்கு தமிழகம் தேவைப்பட்ட வேளையில் உதவவில்லை என்ற குமுறல் ஈழத்து மக்களிட்மும், வருத்தம் தமிழக மக்களிடமும் இருக்கிறது. தமிழக ஆட்சியாளர்களின் எண்ணவோட்டம் குறித்து அறிய முயல்வதை 176000 கோடியோடு விட்டுவிடுவது மனநலத்துக்கு நன்மை பயக்கும் என்று நடத்தைசார் ஆய்வு (Behavioral Research) முடிவுகள் சொன்னதால்  சற்று நிறுத்தியிருந்தேன். மீண்டும் ஆட்சியாளரை விடுத்து சற்றே பிரச்சினையை அலசுவோம்.

ஈழப் போராட்டம் ஏதோ 1983ல் துவங்கியதாக ஒரு பரவலான, தவறான நம்பிக்கை இருக்கிறது. ஆங்கிலேயர் காலத்தில் தேயிலைத் தோட்டத்தில் பணியாற்றச் சென்றோரே ஈழத்தமிழர் என்பது பெருந்திரிபு. ஈழப் பிரச்சினை ஒரு நெடும்பகை. தமிழகத்து மூவேந்தர் காலம் தொட்டு இருந்து வரும் சிக்கல். நாம் அவர்களை வென்று ஆள்வதும், அவர்கள் நம்மை வெல்வதும் மாறி மாறி நடந்து வந்திருக்கிறது. ஈழத்துக்கும் தமிழகத்துக்கும் இருக்கும் தொடர்பு காலங்காலமாக இருந்துவரும் உறவு.

சிங்களரும் தமிழரும் பொதுவில் எதிரும் புதிருமாய் ஆனது சிங்கள பேரினவாதம் தொடங்கிய போது. 1970களில் பேரினவாதம் வலுப்பெற்று 1983ல் தமிழர்கள் அகதிகளாய் வெளியேறியதில் இனப்போராட்டமாக வெடித்தது. காந்தியத்தைச் சிலர் தத்தெடுத்துக் கொண்டபோதும் பிரபாகரனின் தலைமையிலான விடுதலைப் புலைகளின் உணர்ச்சி கலந்த ஆயுதப் போராட்டம் பலரது ஆதரவைப் பெற்றது. எம்ஜிஆர் முதல் பல தமிழகத் தலைவர்கள் புலிகளை ஆதரித்தனர், உதவிகள் செய்தனர். மைய அரசு ஒரு காலம் வரை இதற்கு ஆதரவாக இருந்து பின் பல்வேறு காரணிகளினால் மாறியது.

இராஜீவ் காந்தி தெற்காசியாவில் பலமான தலைவனாக உருவாகும் நோக்கத்தில் அண்டை நாடுகளில் அமைதியை நாட்டுவோம் என்று அமைதிப் படையை அனுப்பினார். ஆனால், யார் எதிரி என்பது சரியாகத் அறிவுறுத்தப்படாமல் “திருப்பதி மலையில் மொட்டைத் தாத்தனைத் தேடிப்பிடி” என்ற வகையில் “இலங்கையில் அமைதியை நிலைநாட்டுக” என்று கட்டளையிடப்பட்ட படை பல உத்திசார் தவறுகள் செய்தது. அதற்கான காரணிகளை ஆராயப்போந்தால் அன்றைய பாரதத்தின் பல தவறான வெளியுறவு மற்றும் இராணுவக் கொள்கைகளை அலச வேண்டும். (இப்போது நேரமில்லை!)

பிரச்சினையின் ஆணிவேரைப் புரிந்து கொள்ளாத அரசியல் தலைவராக இருந்தார் இராஜீவ்காந்தி. ஆனால் அவரது நோக்கம் சரியானது. ஈழப் பிரச்சினையின் அடிப்படையை அவருக்குப் பேசிப் புரிய வைக்க முடிந்த தலைவர்கள் ஒரு சிலரில் பலர் அரசியல் காரணங்களால் ஓரங்கட்டப்பட்டார்கள். சிலர் அரசியல் காரணங்களால் வாளாவிருந்தார்கள். இராஜீவின் அண்மையும் நம்பிக்கையும் பெற்றிருந்த எம்ஜிஆர் உடல் நலமின்மையால் செயல் குன்றிப் போனார்.

அதே நேரம் புலிகள் ஆயுதப் போராட்டம் நெறிப்படுத்தலின்றி தமிழகத்தில் சட்டம் ஒழுங்குப் பிரச்சினைகளை உருவாக்கிற்று. அகதிகளாய் வந்தோரில் சிலர் உறவின் உரிமையைச் மிகையாக மீறியதும் சர்வதேச அரங்கில் பாரத அரசுக்கு நெருக்கடி தந்தது. இராஜீவ், பிரபாகரன் இருவருமே இந்தக் கால கட்டத்தில் தவறான வழிகாட்டுதலால் தவறிழைத்தனர். தமிழினத்தின் விடுதலைக்குப் பேர் வாங்குவது யார் என்ற போட்டியில் தமிழகத் தலைவர்கள் கருணாநிதி, வீரமணி உள்ளிட்ட சிலர் தமிழினத் தலைமை என்ற பட்டத்தின் பின் சென்று பட்டத்திற்குக் காரணமான தமிழினத்தை மறந்தனர்.

ஈழத்தைச் சொல்லியே பலர் சொந்தக் கணக்கில் பணம் பார்த்தனர். இலக்கில் தெளிவின்றி அனுப்பப்பட்ட அமைதிப்படை பாரதம் திரும்பியது. படை போன போது தமிழினத்தின் கதி பற்றிக் கடிதத்திலும் கட்டுரையிலும் மட்டுமே கவலைப்பட்ட கருணாநிதி, மத்தியில் சிநேகமான ஆட்சி என்பதால் திரும்பிய படையை வரவேற்க மறுத்தார்.

உட்கார்ந்து பேசிப் புரிய வைத்தால் உதவக்கூடியவர் என்ற நிலையில் இருந்த இராஜீவ்காந்தி 1991ல் கொலையானது புலிகளின் மீதான வெறுப்பை வேரூன்றச் செய்தது. புலிகள் இராஜீவைக் கொலை செய்ய வலுவானதொரு காரணம் அமைதிப்படையாக மட்டும் இருக்க முடியாது. பொன்மயமான அமைதிக் கோட்பாட்டால் (Golden Silence) வெளிச்சத்துக்கு வரவியலாத காரணங்கள் பல புதைந்து போயின. பணம் முதல் KGB வரை பல காரணங்கள் சொல்லப்படுகின்றன. உண்மை இன்று வரை தெளிவாகத்  தெரியவில்லை.

நரசிம்மராவ் ஆட்சிக்கு வந்தபின் லேவாதேவியில் போன தங்கத்தை மீட்டெடுக்கவே சிண்டைப் பிய்த்துக் கொண்ட பாரதம் சில ஆண்டுகள் சுற்றுப்புறத்தில் பஞ்சாயத்துப் பேசுவதை நிறுத்தி வைத்தது.  பொருளாதாரம் சார்ந்த உள்நாட்டுப் பிரச்சினைகள் தலைக்கு மேலே இருந்தன. தமிழகத்தில் முதல்வரான ஜெயலலிதா முற்று முச்சூடும் புலிகளைப் புறக்கணித்தார். காரணம் இராஜீவ் கொலையும் அதனால் தமிழக மக்களின் புலிகள் மீதான வெறுப்பும்.

1990களில் துவங்கி புலிகள் தமக்கு நண்பர்களை விட எதிரிகளையே அதிகமாக்கிக் கொண்டனர். இந்தக் காலகட்டத்தில் புலிகள் செய்த தவறுகள், குற்றங்கள் அதிகரித்தன. சர்வதேச அரங்கில் புலிகள் மக்கள் சார்ந்த போராளிகள், இன விடுதலைக்குப் போராடும் குழு என்றிருந்த பிம்பம் புலிகளால் பாதியும், அவர்களை ஆதரித்த சிலரால் பாதியுமாகச் சிதறடிக்கப்பட்டன. சந்திரிகாவின் வெளியுறவு அமைச்சர் கதிர்காமர் சவப்பெட்டியின் மீது  நச்சென்று ஆணிகளை அடித்து வைத்தார்.

இருந்த சில உருப்படியான நண்பர்களையும் புலிகள் பகைத்துக் கொண்டனர். புலிகள் சர்வதேச அளவில் ஆயுதம் மட்டுமல்லாது பழம்பொருட்கள் உள்பட பலதும் கடத்தி ஈழப் போராட்டத்துக்குப் பணம் சேர்தனர். ஆனால் சர்வதேச ஆதரவு என்பதைப் பற்றிக் அவர்கள் கவலையேபடாது செய்த பல செயல்கள், புலிகள் பயங்கரவாதிகள், மனித விரோத சக்திகள்  என்ற வாதத்துக்கு வலு சேர்த்தது. அவர்கள் மீது நம்பிக்கை வைத்திருந்த ஈழமக்களின் எதிர்காலத்தை நாசமாக்கியது.

புலிகளுக்கு இராஜ தந்திர உதவிகள் செய்தோரைவிட, இராஜ தந்திரமாய் அவர்களைப் பயன்படுத்தியோரே அதிகம். பிரபாகரன் பெயரைச் சொல்லி தமிழகத்தில் பெரிய மனிதரானோர் அதிகம். ஈழத்தமிழர் நல்வாழ்வுக்கு அவர்கள் செய்தது என்னவென்று இன்று பார்த்தால் போட்ட பணம் நிலைக்கட்டும் சச்சாமி என்று இராஜபக்சேவின் சேவடி பணிந்தது தான்.

சற்றே உட்கார்ந்து யோசித்தால் ஈழத்தமிழ் இனப் போராட்டத்தை சர்வதேச இராஜதந்திர அரங்கில் (International Diplomatic Platform) எடுத்துச் செல்ல புலிகள் தேர்வு செய்த களமும் நம்பிய மனிதர்களும் தவறோ என்று தோன்றுகிறது. பாரதத்தின் மைய அரசுக்கு இலங்கை அரசின் Ethnic cleansing வேலைகள் பற்றி சரியாக எடுத்துரைத்து திருத்தமான முறையில் அழுத்தம் கொடுக்கப்படவில்லை.சர்வதேச சமுதாயத்தை சந்திரிகா அணடக்கட்டிக் கொண்டது போல, தமிழர்கள் செய்யவில்லை.

ஈழத்தை வைத்து யார் பெயரெடுப்பது என்ற போட்டியில் ‘தமிழினத்தலைவர்கள்’ இருந்துவிட, செயல்படும்  தலைவர்கள் சரியான ஆலோசனையின்றி சொதப்பிவிட, இடையிலே சில தரகர்கள் சம்பாதிக்க என்று ஆளாளுக்கு அவரவர் வேலை நடந்துவிட, நாடு, வீடு , மக்கள், உறவு இவற்றை இழந்து, எதிர்காலம் எப்படியென்று தெரியாமல் கொஞ்சமே கொஞ்சம் நம்பிக்கை இழையோட வருத்தத்திலும் ஏக்கத்திலும் இருப்பது ஈழத்திலும் திருவாளர் பொதுஜனம் தான். யார் வீடு கட்டி அடித்தாலும் அடிவங்குவது என்னவோ எங்குமே பொதுஜனம்தானே. ஈழம் மட்டும் விதிவிலக்காகுமா என்ன?

ஈழத்துக்கு இருப்படியாக என்னென்ன செய்திருக்கலாம்? இப்போதும் என்ன செய்ய முடியும்?  என் எண்ணத்தை விரைவில் சொல்வேன்.

மத்தியில் மூன்றாவது அணி?

December 26, 2010

ஹைடெக் நாயுடு என்று ஆந்திரவாடுக்களால் போற்றப்பட்ட சந்திரபாபு நாயுடு இரண்டாவது முறையாக எதிர்க்கட்சித் தலைவராக இருக்கும் இவ்வேளையில் மழையால் பாதிக்கப்பட்டவர்களுக்கு நிவாரணம் சரியாக வழங்கவில்லை என்பதால் உண்ணாவிரதம் இருந்தார். உடல் நிலை மோசமாகி ஆஸ்பத்திரியில் சிகிச்சை பெற்று உண்ணாவிரதத்தைக் கைவிட்டார்.

இந்நிலையில் ஜெயலலித்தா சந்திரபாபு நாயுடுவுக்கு  ஒரு கடிதம் எழுதியுள்ளார். கடிதத்தின் சாராம்சம் இங்கே:

ஆட்சியில் இருப்பவர்கள் மக்கள் விரோத செயல்களில் ஈடுபடும் போது, எதிர்க்கட்சி தலைவர்கள் அதை எதிர்த்து கடுமையாக போராடி மக்கள் நலனை பாதுகாக்க வேண்டியுள்ளது. ஆங்கிலேயர்களுக்கு எதிராக திறமை வாய்ந்ததாக இருந்த காந்திய முறையிலான போராட்டங்கள், காந்தியின் காங்கிரஸ் ஆட்சி செய்யும் மத்தியிலும், ஆந்திராவிலும் மதிப்பை இழந்துள்ளன. உங்களது உயிர் மதிப்பு வாய்ந்தது. மத்திய, மாநில அளவில் பல்வேறு பொதுப் பிரச்னைகளில் போராட, நீங்கள் உயிருடன் இருக்க வேண்டும். எனது தனிப்பட்ட வேண்டுகோளை ஏற்று, உண்ணாவிரதப் போராட்டத்தை கைவிட்டு, போராட்டத்தை அடுத்த கட்டத்திற்கு எடுத்து செல்ல வேண்டும்.

இதில் காங்கிரசை இடித்துரைத்து காந்தியத்தை மதிக்காத கட்சி என்றும் கூறியுள்ளார் ஜெயலலிதா. அறப் போராட்டங்களை மதிக்காத கட்சி என்று காங்கிரசை அவர் சாடியுள்ளதால் காங்கிரஸ்-அதிமுக கூட்டணிக்கு வாய்ப்பு இருப்பதாக நம்ப இடமில்லை. இராகுல் காந்தி வேறு தமிழகம் வந்தும் மாநிலக் கட்சித் தலைவர்கள் யாரையுமே சந்திக்கவில்லை. அறிவு ஜீவிகள் காங்கிரசுக்கு வேண்டும் என்று சொல்லி வெற்றிடம் எங்கே என்று வெளிச்சம் போட்டுக் காட்டிவிட்டுப் போய்விட்டார் இராகுல் காந்தி.

இந்நிலையில் ஊழலுக்கு எதிராகப் போராட்டம் என்று கிளம்பியிருப்பவர் 2G ஊழலில் திமுகவுடன் ஊறிய காங்கிரசுடன் கூட்டு வைத்தால் மக்கள் தேர்தலில் தாளித்துவிடும் அபாயமும் இருக்கிறது. காங்கிரசு வழக்கம் போல வாங்க சுருட்டலாம் என்று காமன்வெல்த் விளையாட்டுப் போட்டி முதல் கஞ்சிக்குக் கடித்துக் கொள்ளும் வெங்காயம் வரை காசு பார்க்கிறது. அது பற்றிக் கொஞ்சமும் கூச்சநாச்சமே இல்லாமல் அதன் தலைவர்கள் சிரித்தபடி பவனி வருகிறார்கள்.

இரண்டொரு மாதங்களுக்கு முன் ஜெயலலிதா 18 பா.ம.உ.க்களின் (MP) ஆதரவைத் தருவதாகச் சொன்ன பிறகே காங்கிரசுக்கட்சி 2G அலைக்கற்றை ஊழலில் நடழ்வடிக்கைக்கு முனைந்தது. பாஜக போராடியது என்றாலும் கவிழ்ந்தால் கவிழ்ந்து போ என்ற நோக்கில் அது போராடியது. 2G ஊழலுக்கு நடவடிக்கை எடுங்கள் நீங்கள் கவிழாமல் நான் தாங்குவேன் என்றார் ஜெயலலிதா.

அதற்கு அவர் தந்த காரணம் ஒத்த கருத்துடைய தலைவர்கள் ( Like minded leaders). ஆனால் அந்தத் திட்டம் வேலைக்கு ஆகவில்லை. காரணம் காங்கிரஸ்-திமுக இடையே 2Gல் 1000 இருந்திருக்கலாம். அவர்கள் ஆளுக்கு 500 எடுத்துக் கொண்டிருக்கலாம். போட்டுக் கொடுப்பதக திமுக மிரட்டியிருக்கலாம். அதனால் Dealஆ No Dealஆ என்று ஜெயலலிதா கேட்ட போது No Deal என்று காங்கிரசுக்கட்சி சொல்லியிருக்கலாம்.

ஆக இப்போது மாநிலம் மட்டுமல்லாது மத்தியிலும் ஒரு கலக்கு கலக்குவதற்கு கலம் கனிந்திருப்பதாக அவர் கருதுகிறார். தேசப் பாதுகாப்பு குறித்த கவலை தமக்கிருப்பதாக Times Now பேட்டியில் அவர் சொல்லியிருந்தார். அதற்காக பாஜகவுடன் கூட்டணி என்றால் இப்போது தான் சற்றே நெருங்கி வந்த கிறிஸ்தவர்கள் விலகிவிடுவார்கள்.

எனவே ஒத்த கருத்துடைய தலைவர்களைச் சேர்த்துக் கொண்டு மூன்றாவது அணி அமைக்கும் எண்ணத்தில் இருக்கிறாரோ என்று காற்றோடு வந்து காதில் விழுந்த தகவல் சந்திரபாபு நாயுடுவுக்குக் கடிதம் எழுதியது மூலம் உண்மையாகலாம் என்று தோன்றுகிறது. ஆனால், ஜெயலலிதா 6ஆம் நம்பர்காரர். அதனால் அவருக்கு 3ஆம் நம்பர் ஒத்துவராது என்று ஜோதிட வல்லுநர்கள் தெரிவிக்கிறார்கள்.

அரசியலில் எதுவும் எப்போதும் நடக்கலாம் என்பது அனுபவம் தரும் பாடம். ஆகவே இந்த 3ஆவது அணி வெறும் வதந்தியா உண்மையா என்பது விரைவில் தெரியும்.


%d bloggers like this: