Archive for the ‘அரசியல்’ category

குஷிமிகு குஜராத்!

December 30, 2010

Business India ஜனவரி 9, 2011 தேதியிட்ட இதழைப் படித்துக் கொண்டிருந்த் போது “குஜராத்: வணிகத்தின் கனவு இலக்கு” என்று ஒரு கருத்தாய்வு படித்தேன். (அது பற்றிப் பிறகு சொல்வேன்) நிஜமாகவே தமிழகம் அப்படி வராதா என்ற ஏக்கம் ஏற்பட்டது.  நரேந்திர மோடி நல்லபடியாக ஆள்கிறார் என்று சொன்னாலே வடிவேலு மாதிரி “அவனா நீயி?” என்று கேட்கும் தமிழக அறிவுஜீவிகள் இதை செரிக்கத் திணறுவார்கள். ஜெயலலிதாவின் 2001-06 ஆட்சி நன்றாக இருந்தது என்று சொன்னாலே சொன்னவரையும் அவரையும் சாதி சொல்லித் திட்டும் பகுத்தறிவுப் பெட்டகங்கள், மோடியை எப்படி ஏற்பார்கள் .

கோடிகளில் கொள்ளை அடித்தவர்களையும் சாதி சொல்லிக் காப்பாற்றத் துணியும் பகுத்தறிவுப் புலிகளையே பார்த்துப் பழகிய நமக்கு இப்படி ஒரு முதல்வர் என்பது ஆச்சரியம்தான். இந்தியாவில் இப்படி ஒரு வளர்ச்சிப்பணி ஆற்றும் முதல்வர் என்பது குறித்துப் பெருமைப்பட்டாலும், தமிழகத்தில் இப்படி இல்லை என்பது பொறாமை தருகிறது. (ஜெ.  20011ல் மீண்டு(ம்) வந்து விட்டதைப் பிடிப்பார் என நம்பலாம்!)

24 மணிநேரம் மின்சாரம் இருக்கிறது. (அப்படின்னா?) விவசாயம் செழிக்கிறது. (ஓஹோ?) அது கிடக்கட்டும். கோத்ராவில் மோடி பலரைக் கொன்றார் தெரியுமா என்பர். தீஸ்தா செதல்வாட் போராடுகிறாரே தெரியுமா என்பர். அவர்கள் சில நாட்டு நடப்புகளை வசதியாக மறப்பர் அல்லது மறைப்பர்.

சமீபத்தில் உச்சநீதிமன்றத்தில் சமர்பிக்கப்பட்ட சிறப்பு புலனாய்வுக் குழு அறிக்கை கோத்ரா கலவரத்திற்கு நரேந்திர மோடி  காரணமில்லை என்று தெரிவித்திருக்கிறது.  அவர் தமது அரசியல் சாசனக் கடமைகளில் இருந்து வழுவி மக்களைக் காக்கத் தவறிவிட்டார் என்ற குற்றச்சாட்டுக்கு  குற்றத்தில் சிக்கவைக்கும் பொருண்மைகள் போதுமான அளவில் இல்லை என்பது சிறப்பு புலனாய்வுக் குழு கண்டு சொல்கிற உண்மை.

இதை உண்மை என்று எப்படிச் சொல்வாய்? மோடி செய்யவில்லை என்பதை நீ நேரில் பார்த்தாயா என்று கேட்போர் நிற்க.  சிறப்பு புலனாய்வுக் குழு நரேந்திர மோடியை மணிக்கணக்கில்  விசாரித்த பிறகே அறிக்கை அளித்தது. உச்சநீதிமன்றத்தின் கண்காணிப்புக்கு உட்பட்ட சிறப்பு புலனாய்வுக் குழு தீர விசாரித்துச் சொன்ன செய்தியில் பொய் இருக்க வாய்ப்பே இல்லை.

தவிரவும், குஜராத் கலவரம் தொடர்பான சிறப்புப் புலனாய்வு நீதிமன்றத்தில் பல கற்பனைப் புனைவுகள் கலவர நிகழ்வுகள்  என வாக்குமூலங்களாக வரிசைகட்டி வருகின்றன. இந்த வழக்கில் தீஸ்தா செதல்வாட் ஜாவேத் என்கிற சமூக சேவகி அம்மையார் மிகவும் தீவிரமாக இறங்கி வேலை செய்கிறார். அவர் ஒரு தொண்டு நிறுவனமும் நடத்துகிறார். நன்கொடைகள் தாராளமாக வரிவிலக்கெல்லாம் காட்டி வாங்கிக் கொள்ளவும் செய்கிறார்.

அவர் செய்யும் தொண்டு பாதிக்கப்பட்டவர் என்று நீதிமன்றத்தில் நிறுத்துவோர் பெயரில் இவரே இட்டுக்கட்டிய கொடூரக் கொலைக் கதைகளைக் (cooking up macabre tales of killings) கலவர நிகழ்வுகள் என்று பிரமாண வாக்குமூலமாக சமர்ப்பிப்பது. தொண்டு நிறுவனம் என்பதால் ஏதாவது உதவி கிடைக்காதா என்ற எதிர்பார்ப்பில், “கடையை எரிச்சுப்புட்டங்க, வீட்டைக் கொளூத்திப்புட்டாங்க, உதவி செய்யுங்கம்மா!” என்று வருவோரிடம் பேர் ஊர் முகவரி எல்லாம் வாங்கிக் கொண்டு,அவர்களிடம் வெற்றுத் தாட்களில் கையொப்பமும் பெற்று, “துள்ளத் துடிக்கக் கொலை செய்தார்கள், கதறக் கதற கற்பழித்தார்கள், அவர்கள் எல்லோரும் நரேந்திர மோடியின் ஆட்கள், நான் பயத்தால் பார்த்துக் கொண்டு மட்டுமிருந்தேன்” என்கிற வகையில் எழுதி நீதிமன்றத்தில் அவர்கள் பெயரில் பிரமாண வாக்குமூலம் சமர்ப்பித்திருக்கிறார்.
(http://www.dailypioneer.com/281457/%E2%80%98Teesta-drafted-affidavits-didnt-divulge-contents.html)

பலருக்குத் தங்கள் பெயரில் சமர்ப்பிக்கப்பட்ட வாக்குமூலத்தில் என்ன எழுதியிருக்கிறது என்பதே தெரியவில்லை. அப்படிக்  ‘கலவரத்தில் பாதிக்கப்பட்டோரை’ விசாரித்த போது உளறிக் கொட்டி, கடைசியில் வாக்குமூலத்தைப் பற்றி தமக்கேதும் தெரியாது என்றும் ‘அந்தம்மா’ சொன்னதைத் தான் தாங்கள் சொல்வதாகவும் கூறியுள்ளனர். என் பெயரில் எப்படி இல்லாத கதைகளைக் கட்டுவாய் என்று சிலர் உச்ச நீதிமன்றத்தில் இந்த சமூக சேவகி அம்மையார் வழக்குத் தொடர்ந்துள்ளனர்.

தீஸ்தா அம்மையாரிடம் உதவியாளராய் வேலை பார்த்த ரயிஸ்கான் பதான் என்பவர் தமக்குத் தெரியாமல் தம் பெயரில் தீஸ்தா அம்மையார் இ-மெயில்களை அனுப்பியும் பெற்றும், தம் பெயரில் மேற்கூறிய மோசடிகளைச் செய்ததாக சிறப்புப் புலனாய்வு அதிகாரியிடம் வாக்குமூலம் அளித்துள்ளார்.

அறிவு ஜீவிகள் பலர் செதல்வாட் அம்மையாருடன் சேர்ந்து ஓய்வு பெற்ற நீதிபதிகள் சிலரை வைத்து “கவலைகொண்ட மக்கள் தீர்ப்பாயம் (Concerned Citizens Tribunal)” ஒன்றை அமைத்து, “சமர்ப்பிக்கப்பட்ட சாட்சி ஆதாரங்களின் அடிப்படையில் சங்பரிவார் அமைப்பினர் குற்றமிழைத்தனர். நரேந்திர மோடி கலவரத்திற்குத் திட்டம் தீட்டி, குற்றவாளிகளுக்குத் தலைமை தாங்கினார்” என்று தீர்ப்பளித்தனர்.

இது அம்மையாரின் தொண்டு நிறுவனத்தின் சாதனைகளில் ஒன்றாக அவர்களின் இணைய தளத்தில் குறிப்பிடப்பட்டுள்ளது. அது காட்சிப்பிழை என்பதும், சமர்ப்பிக்கப்பட்ட சாட்சி ஆதாரங்கள் செதல்வாட் அம்மையார் சமைத்துத் தந்தவை என்பது இப்போது தெரிய வருகிறது.

ஆக ஊடகங்கள் பதிவு செய்தவை உண்மைக்குப் புறம்பான கட்டுக்கதைகள் என்பது தற்போது வெளிச்சத்துக்கு வந்துகொண்டிருக்கிறது. அறிவுஜீவிகள் அவசரப்பட்டு விட்டார்கள் என்பதுவும் புலனாகிறது. Some vested interests are striving so hard to keep the people and truth in dark என்பது ஐயம். தீஸ்தா அம்மையார் கூறும் குற்றச்சாட்டுகள் திரிபற்றவை என்று தெளிவாகும் வரை இந்த ஐயம் தொடரும்.

தற்போது நீதிமன்றத்தில் தீஸ்தா அம்மையாரால் பதிவு செய்யப்பட்ட நிகழ்வுகளின் நம்பகத்தன்மையே கேள்விக்குறி, அடிப்படையே அடுக்கப்பட்ட பொய் எனும் போது கிட்டவோ தட்டவோ அவற்றை ஏற்பது இகழ்ச்சி.

(இது குறித்து நான் தமிழ் பேப்பர், தமிழ் ஹிந்து ஆகிய தளங்களிலலிட்ட பின்னுட்டங்களில் தட்டெழுதிய சில வாசகங்கள் அப்படியே இங்கிருக்கும். )

என் கேள்வி:

நரேந்திர மோடி குஜராத்தை 9 ஆண்டுகள் ஆண்டு மாநிலத்தின் பொருளாதார, வாழ்க்கைத்தர வளர்ச்சியில் சாதனை படைத்திருக்கிறார். ச்.  மத்திய அரசு எதிர்க்கட்சி, ஊடகங்கள் அவரை நிரந்தரக் குற்றவாளி என்கின்றன. இருப்பினும் மாநில மக்கள் நலன் முன்வைக்கப்பட்டு மிகவும் சிறப்பாகச் செயல்படுகிறார் மோடி.

கருணாநிதிக்கு இந்தத் ‘தகுதி’ எதுவுமே இல்லை. மத்திய் அரசில் 12 ஆண்டுகளாகப் பங்கு வகிக்கிறார். குற்றச்சாட்டுகள் இருக்கின்றன, ஆனால் வழக்கு விசாரணை எல்லாம் மருந்துக்குக் கூடக் கிடையாது.  ஊடகங்கள் அவரை பாசம் நேசம் இவையெல்லாம் மிகுந்து போற்றுகின்றன. 50 ஆண்டுகால அரசியல் அனுப்பவம் வேறு. நிர்வாகத்தில் சூரப்புலி என்று பெயர் பெற்றிருக்கிறார்.

ஆனாலும் தமிழகம் எந்தக் கருத்தாய்விலும் முதலிடம் பெறவில்லையே ஏன்? நமக்கு நாமே திட்டம் தான் இதற்கு ஒத்துவருமோ?

ஈழத்தின் அவதியும் தமிழகத்தின் அசதியும் – I

December 26, 2010

ஈழத்திற்கு தமிழகம் தேவைப்பட்ட வேளையில் உதவவில்லை என்ற குமுறல் ஈழத்து மக்களிட்மும், வருத்தம் தமிழக மக்களிடமும் இருக்கிறது. தமிழக ஆட்சியாளர்களின் எண்ணவோட்டம் குறித்து அறிய முயல்வதை 176000 கோடியோடு விட்டுவிடுவது மனநலத்துக்கு நன்மை பயக்கும் என்று நடத்தைசார் ஆய்வு (Behavioral Research) முடிவுகள் சொன்னதால்  சற்று நிறுத்தியிருந்தேன். மீண்டும் ஆட்சியாளரை விடுத்து சற்றே பிரச்சினையை அலசுவோம்.

ஈழப் போராட்டம் ஏதோ 1983ல் துவங்கியதாக ஒரு பரவலான, தவறான நம்பிக்கை இருக்கிறது. ஆங்கிலேயர் காலத்தில் தேயிலைத் தோட்டத்தில் பணியாற்றச் சென்றோரே ஈழத்தமிழர் என்பது பெருந்திரிபு. ஈழப் பிரச்சினை ஒரு நெடும்பகை. தமிழகத்து மூவேந்தர் காலம் தொட்டு இருந்து வரும் சிக்கல். நாம் அவர்களை வென்று ஆள்வதும், அவர்கள் நம்மை வெல்வதும் மாறி மாறி நடந்து வந்திருக்கிறது. ஈழத்துக்கும் தமிழகத்துக்கும் இருக்கும் தொடர்பு காலங்காலமாக இருந்துவரும் உறவு.

சிங்களரும் தமிழரும் பொதுவில் எதிரும் புதிருமாய் ஆனது சிங்கள பேரினவாதம் தொடங்கிய போது. 1970களில் பேரினவாதம் வலுப்பெற்று 1983ல் தமிழர்கள் அகதிகளாய் வெளியேறியதில் இனப்போராட்டமாக வெடித்தது. காந்தியத்தைச் சிலர் தத்தெடுத்துக் கொண்டபோதும் பிரபாகரனின் தலைமையிலான விடுதலைப் புலைகளின் உணர்ச்சி கலந்த ஆயுதப் போராட்டம் பலரது ஆதரவைப் பெற்றது. எம்ஜிஆர் முதல் பல தமிழகத் தலைவர்கள் புலிகளை ஆதரித்தனர், உதவிகள் செய்தனர். மைய அரசு ஒரு காலம் வரை இதற்கு ஆதரவாக இருந்து பின் பல்வேறு காரணிகளினால் மாறியது.

இராஜீவ் காந்தி தெற்காசியாவில் பலமான தலைவனாக உருவாகும் நோக்கத்தில் அண்டை நாடுகளில் அமைதியை நாட்டுவோம் என்று அமைதிப் படையை அனுப்பினார். ஆனால், யார் எதிரி என்பது சரியாகத் அறிவுறுத்தப்படாமல் “திருப்பதி மலையில் மொட்டைத் தாத்தனைத் தேடிப்பிடி” என்ற வகையில் “இலங்கையில் அமைதியை நிலைநாட்டுக” என்று கட்டளையிடப்பட்ட படை பல உத்திசார் தவறுகள் செய்தது. அதற்கான காரணிகளை ஆராயப்போந்தால் அன்றைய பாரதத்தின் பல தவறான வெளியுறவு மற்றும் இராணுவக் கொள்கைகளை அலச வேண்டும். (இப்போது நேரமில்லை!)

பிரச்சினையின் ஆணிவேரைப் புரிந்து கொள்ளாத அரசியல் தலைவராக இருந்தார் இராஜீவ்காந்தி. ஆனால் அவரது நோக்கம் சரியானது. ஈழப் பிரச்சினையின் அடிப்படையை அவருக்குப் பேசிப் புரிய வைக்க முடிந்த தலைவர்கள் ஒரு சிலரில் பலர் அரசியல் காரணங்களால் ஓரங்கட்டப்பட்டார்கள். சிலர் அரசியல் காரணங்களால் வாளாவிருந்தார்கள். இராஜீவின் அண்மையும் நம்பிக்கையும் பெற்றிருந்த எம்ஜிஆர் உடல் நலமின்மையால் செயல் குன்றிப் போனார்.

அதே நேரம் புலிகள் ஆயுதப் போராட்டம் நெறிப்படுத்தலின்றி தமிழகத்தில் சட்டம் ஒழுங்குப் பிரச்சினைகளை உருவாக்கிற்று. அகதிகளாய் வந்தோரில் சிலர் உறவின் உரிமையைச் மிகையாக மீறியதும் சர்வதேச அரங்கில் பாரத அரசுக்கு நெருக்கடி தந்தது. இராஜீவ், பிரபாகரன் இருவருமே இந்தக் கால கட்டத்தில் தவறான வழிகாட்டுதலால் தவறிழைத்தனர். தமிழினத்தின் விடுதலைக்குப் பேர் வாங்குவது யார் என்ற போட்டியில் தமிழகத் தலைவர்கள் கருணாநிதி, வீரமணி உள்ளிட்ட சிலர் தமிழினத் தலைமை என்ற பட்டத்தின் பின் சென்று பட்டத்திற்குக் காரணமான தமிழினத்தை மறந்தனர்.

ஈழத்தைச் சொல்லியே பலர் சொந்தக் கணக்கில் பணம் பார்த்தனர். இலக்கில் தெளிவின்றி அனுப்பப்பட்ட அமைதிப்படை பாரதம் திரும்பியது. படை போன போது தமிழினத்தின் கதி பற்றிக் கடிதத்திலும் கட்டுரையிலும் மட்டுமே கவலைப்பட்ட கருணாநிதி, மத்தியில் சிநேகமான ஆட்சி என்பதால் திரும்பிய படையை வரவேற்க மறுத்தார்.

உட்கார்ந்து பேசிப் புரிய வைத்தால் உதவக்கூடியவர் என்ற நிலையில் இருந்த இராஜீவ்காந்தி 1991ல் கொலையானது புலிகளின் மீதான வெறுப்பை வேரூன்றச் செய்தது. புலிகள் இராஜீவைக் கொலை செய்ய வலுவானதொரு காரணம் அமைதிப்படையாக மட்டும் இருக்க முடியாது. பொன்மயமான அமைதிக் கோட்பாட்டால் (Golden Silence) வெளிச்சத்துக்கு வரவியலாத காரணங்கள் பல புதைந்து போயின. பணம் முதல் KGB வரை பல காரணங்கள் சொல்லப்படுகின்றன. உண்மை இன்று வரை தெளிவாகத்  தெரியவில்லை.

நரசிம்மராவ் ஆட்சிக்கு வந்தபின் லேவாதேவியில் போன தங்கத்தை மீட்டெடுக்கவே சிண்டைப் பிய்த்துக் கொண்ட பாரதம் சில ஆண்டுகள் சுற்றுப்புறத்தில் பஞ்சாயத்துப் பேசுவதை நிறுத்தி வைத்தது.  பொருளாதாரம் சார்ந்த உள்நாட்டுப் பிரச்சினைகள் தலைக்கு மேலே இருந்தன. தமிழகத்தில் முதல்வரான ஜெயலலிதா முற்று முச்சூடும் புலிகளைப் புறக்கணித்தார். காரணம் இராஜீவ் கொலையும் அதனால் தமிழக மக்களின் புலிகள் மீதான வெறுப்பும்.

1990களில் துவங்கி புலிகள் தமக்கு நண்பர்களை விட எதிரிகளையே அதிகமாக்கிக் கொண்டனர். இந்தக் காலகட்டத்தில் புலிகள் செய்த தவறுகள், குற்றங்கள் அதிகரித்தன. சர்வதேச அரங்கில் புலிகள் மக்கள் சார்ந்த போராளிகள், இன விடுதலைக்குப் போராடும் குழு என்றிருந்த பிம்பம் புலிகளால் பாதியும், அவர்களை ஆதரித்த சிலரால் பாதியுமாகச் சிதறடிக்கப்பட்டன. சந்திரிகாவின் வெளியுறவு அமைச்சர் கதிர்காமர் சவப்பெட்டியின் மீது  நச்சென்று ஆணிகளை அடித்து வைத்தார்.

இருந்த சில உருப்படியான நண்பர்களையும் புலிகள் பகைத்துக் கொண்டனர். புலிகள் சர்வதேச அளவில் ஆயுதம் மட்டுமல்லாது பழம்பொருட்கள் உள்பட பலதும் கடத்தி ஈழப் போராட்டத்துக்குப் பணம் சேர்தனர். ஆனால் சர்வதேச ஆதரவு என்பதைப் பற்றிக் அவர்கள் கவலையேபடாது செய்த பல செயல்கள், புலிகள் பயங்கரவாதிகள், மனித விரோத சக்திகள்  என்ற வாதத்துக்கு வலு சேர்த்தது. அவர்கள் மீது நம்பிக்கை வைத்திருந்த ஈழமக்களின் எதிர்காலத்தை நாசமாக்கியது.

புலிகளுக்கு இராஜ தந்திர உதவிகள் செய்தோரைவிட, இராஜ தந்திரமாய் அவர்களைப் பயன்படுத்தியோரே அதிகம். பிரபாகரன் பெயரைச் சொல்லி தமிழகத்தில் பெரிய மனிதரானோர் அதிகம். ஈழத்தமிழர் நல்வாழ்வுக்கு அவர்கள் செய்தது என்னவென்று இன்று பார்த்தால் போட்ட பணம் நிலைக்கட்டும் சச்சாமி என்று இராஜபக்சேவின் சேவடி பணிந்தது தான்.

சற்றே உட்கார்ந்து யோசித்தால் ஈழத்தமிழ் இனப் போராட்டத்தை சர்வதேச இராஜதந்திர அரங்கில் (International Diplomatic Platform) எடுத்துச் செல்ல புலிகள் தேர்வு செய்த களமும் நம்பிய மனிதர்களும் தவறோ என்று தோன்றுகிறது. பாரதத்தின் மைய அரசுக்கு இலங்கை அரசின் Ethnic cleansing வேலைகள் பற்றி சரியாக எடுத்துரைத்து திருத்தமான முறையில் அழுத்தம் கொடுக்கப்படவில்லை.சர்வதேச சமுதாயத்தை சந்திரிகா அணடக்கட்டிக் கொண்டது போல, தமிழர்கள் செய்யவில்லை.

ஈழத்தை வைத்து யார் பெயரெடுப்பது என்ற போட்டியில் ‘தமிழினத்தலைவர்கள்’ இருந்துவிட, செயல்படும்  தலைவர்கள் சரியான ஆலோசனையின்றி சொதப்பிவிட, இடையிலே சில தரகர்கள் சம்பாதிக்க என்று ஆளாளுக்கு அவரவர் வேலை நடந்துவிட, நாடு, வீடு , மக்கள், உறவு இவற்றை இழந்து, எதிர்காலம் எப்படியென்று தெரியாமல் கொஞ்சமே கொஞ்சம் நம்பிக்கை இழையோட வருத்தத்திலும் ஏக்கத்திலும் இருப்பது ஈழத்திலும் திருவாளர் பொதுஜனம் தான். யார் வீடு கட்டி அடித்தாலும் அடிவங்குவது என்னவோ எங்குமே பொதுஜனம்தானே. ஈழம் மட்டும் விதிவிலக்காகுமா என்ன?

ஈழத்துக்கு இருப்படியாக என்னென்ன செய்திருக்கலாம்? இப்போதும் என்ன செய்ய முடியும்?  என் எண்ணத்தை விரைவில் சொல்வேன்.

மத்தியில் மூன்றாவது அணி?

December 26, 2010

ஹைடெக் நாயுடு என்று ஆந்திரவாடுக்களால் போற்றப்பட்ட சந்திரபாபு நாயுடு இரண்டாவது முறையாக எதிர்க்கட்சித் தலைவராக இருக்கும் இவ்வேளையில் மழையால் பாதிக்கப்பட்டவர்களுக்கு நிவாரணம் சரியாக வழங்கவில்லை என்பதால் உண்ணாவிரதம் இருந்தார். உடல் நிலை மோசமாகி ஆஸ்பத்திரியில் சிகிச்சை பெற்று உண்ணாவிரதத்தைக் கைவிட்டார்.

இந்நிலையில் ஜெயலலித்தா சந்திரபாபு நாயுடுவுக்கு  ஒரு கடிதம் எழுதியுள்ளார். கடிதத்தின் சாராம்சம் இங்கே:

ஆட்சியில் இருப்பவர்கள் மக்கள் விரோத செயல்களில் ஈடுபடும் போது, எதிர்க்கட்சி தலைவர்கள் அதை எதிர்த்து கடுமையாக போராடி மக்கள் நலனை பாதுகாக்க வேண்டியுள்ளது. ஆங்கிலேயர்களுக்கு எதிராக திறமை வாய்ந்ததாக இருந்த காந்திய முறையிலான போராட்டங்கள், காந்தியின் காங்கிரஸ் ஆட்சி செய்யும் மத்தியிலும், ஆந்திராவிலும் மதிப்பை இழந்துள்ளன. உங்களது உயிர் மதிப்பு வாய்ந்தது. மத்திய, மாநில அளவில் பல்வேறு பொதுப் பிரச்னைகளில் போராட, நீங்கள் உயிருடன் இருக்க வேண்டும். எனது தனிப்பட்ட வேண்டுகோளை ஏற்று, உண்ணாவிரதப் போராட்டத்தை கைவிட்டு, போராட்டத்தை அடுத்த கட்டத்திற்கு எடுத்து செல்ல வேண்டும்.

இதில் காங்கிரசை இடித்துரைத்து காந்தியத்தை மதிக்காத கட்சி என்றும் கூறியுள்ளார் ஜெயலலிதா. அறப் போராட்டங்களை மதிக்காத கட்சி என்று காங்கிரசை அவர் சாடியுள்ளதால் காங்கிரஸ்-அதிமுக கூட்டணிக்கு வாய்ப்பு இருப்பதாக நம்ப இடமில்லை. இராகுல் காந்தி வேறு தமிழகம் வந்தும் மாநிலக் கட்சித் தலைவர்கள் யாரையுமே சந்திக்கவில்லை. அறிவு ஜீவிகள் காங்கிரசுக்கு வேண்டும் என்று சொல்லி வெற்றிடம் எங்கே என்று வெளிச்சம் போட்டுக் காட்டிவிட்டுப் போய்விட்டார் இராகுல் காந்தி.

இந்நிலையில் ஊழலுக்கு எதிராகப் போராட்டம் என்று கிளம்பியிருப்பவர் 2G ஊழலில் திமுகவுடன் ஊறிய காங்கிரசுடன் கூட்டு வைத்தால் மக்கள் தேர்தலில் தாளித்துவிடும் அபாயமும் இருக்கிறது. காங்கிரசு வழக்கம் போல வாங்க சுருட்டலாம் என்று காமன்வெல்த் விளையாட்டுப் போட்டி முதல் கஞ்சிக்குக் கடித்துக் கொள்ளும் வெங்காயம் வரை காசு பார்க்கிறது. அது பற்றிக் கொஞ்சமும் கூச்சநாச்சமே இல்லாமல் அதன் தலைவர்கள் சிரித்தபடி பவனி வருகிறார்கள்.

இரண்டொரு மாதங்களுக்கு முன் ஜெயலலிதா 18 பா.ம.உ.க்களின் (MP) ஆதரவைத் தருவதாகச் சொன்ன பிறகே காங்கிரசுக்கட்சி 2G அலைக்கற்றை ஊழலில் நடழ்வடிக்கைக்கு முனைந்தது. பாஜக போராடியது என்றாலும் கவிழ்ந்தால் கவிழ்ந்து போ என்ற நோக்கில் அது போராடியது. 2G ஊழலுக்கு நடவடிக்கை எடுங்கள் நீங்கள் கவிழாமல் நான் தாங்குவேன் என்றார் ஜெயலலிதா.

அதற்கு அவர் தந்த காரணம் ஒத்த கருத்துடைய தலைவர்கள் ( Like minded leaders). ஆனால் அந்தத் திட்டம் வேலைக்கு ஆகவில்லை. காரணம் காங்கிரஸ்-திமுக இடையே 2Gல் 1000 இருந்திருக்கலாம். அவர்கள் ஆளுக்கு 500 எடுத்துக் கொண்டிருக்கலாம். போட்டுக் கொடுப்பதக திமுக மிரட்டியிருக்கலாம். அதனால் Dealஆ No Dealஆ என்று ஜெயலலிதா கேட்ட போது No Deal என்று காங்கிரசுக்கட்சி சொல்லியிருக்கலாம்.

ஆக இப்போது மாநிலம் மட்டுமல்லாது மத்தியிலும் ஒரு கலக்கு கலக்குவதற்கு கலம் கனிந்திருப்பதாக அவர் கருதுகிறார். தேசப் பாதுகாப்பு குறித்த கவலை தமக்கிருப்பதாக Times Now பேட்டியில் அவர் சொல்லியிருந்தார். அதற்காக பாஜகவுடன் கூட்டணி என்றால் இப்போது தான் சற்றே நெருங்கி வந்த கிறிஸ்தவர்கள் விலகிவிடுவார்கள்.

எனவே ஒத்த கருத்துடைய தலைவர்களைச் சேர்த்துக் கொண்டு மூன்றாவது அணி அமைக்கும் எண்ணத்தில் இருக்கிறாரோ என்று காற்றோடு வந்து காதில் விழுந்த தகவல் சந்திரபாபு நாயுடுவுக்குக் கடிதம் எழுதியது மூலம் உண்மையாகலாம் என்று தோன்றுகிறது. ஆனால், ஜெயலலிதா 6ஆம் நம்பர்காரர். அதனால் அவருக்கு 3ஆம் நம்பர் ஒத்துவராது என்று ஜோதிட வல்லுநர்கள் தெரிவிக்கிறார்கள்.

அரசியலில் எதுவும் எப்போதும் நடக்கலாம் என்பது அனுபவம் தரும் பாடம். ஆகவே இந்த 3ஆவது அணி வெறும் வதந்தியா உண்மையா என்பது விரைவில் தெரியும்.

அட வெங்காய வி்லையே! பெரியாரே!!

December 25, 2010

நேற்றைய தினமணியில் ஒரு செய்தி வந்திருக்கிறது. 

மக்கள் அதிகம் பயன்படுத்தும் வெங்காயத்தின் விலை கடுமையாக உயர்ந்துள்ளதே குறைக்க நடவடிக்கை எடுக்கப்படுகிறதா? என்று செய்தியாளர்கள் முதல்வர் கருணாநிதியிடம் கேள்வி எழுப்பினர்.

இதற்கு பதில் அளித்த கருணாநிதி…“வெங்காயம் விலை உயர்ந்தது குறித்து பெரியாரிடம்தான் கேட்கவேண்டும்” என்று பதில் அளித்தார். அதைக் கேட்டு சுற்றியிருந்த அமைச்சர்கள் உள்ளிட்டோர் பலமாகச் சிரித்தனர்.

http://www.dinamani.com/edition/story.aspx?&SectionName=Latest%20News&artid=350262&SectionID=164

இது குறித்த சில கேள்விகள்: (சில என்னுடையவை, சில திருவாளர். பொதுஜனத்தினுடையவை)

  • சரி பெரியாரிடமே கேட்டு சொல்லுங்கள் என்று நிருபர்கள் சொல்லியிருந்தால் இவர் என்ன செய்திருப்பார்?
  • ஓட்டுக் கேட்டு இவரும் திமுகவினரும் வரும்போது மக்கள் பெரியாரிடமே ஒட்டுக் கேட்டுக் கொள்ளுங்கள் என்றால் இவர் என்ன செய்வார்?
  • தாலிக்கு தங்கம் எங்கே, தாளிக்க வெங்காயம் எங்கே , கூத்தாடியே பதவி விலகு! இது எம்ஜிஆர் ஆட்சிக் காலத்தில் அவரை எதிர்த்த தி.மு.க வின் தேர்தல் கோஷம்.  அதை இன்று இவரிடமே திருப்பினால் என்ன செய்வார்?
  • தினமணி பின்னூட்டத்தில் ஒருவர் “இதைப் பெரியாரிடம் சொன்னால் எதால் அடிப்பார்” என்று கேட்டிருந்தார்.
  • வெங்காய விலையை ஏதோ சமாதியில் படுத்துக் கொண்டே பெரியார் ஏற்றிவிட்டது போலச் சொல்லியிருக்கிறாரே, வீரமணி இதற்கு என்ன சொல்கிறார்?

ஜெயலலிதா இதற்கு கடும் கண்டனம் தெரிவிப்பார். வழக்கம் போல சற்று்த் தாமதமாக. ஆனால் அவரது இளைஞர்-இளம்பெண்கள் பாசறை என்ன ஆனது? இந்த வெங்காயப் போராட்டத்திலாவது அதுமுக இளசுகள் களமிறங்குவார்களா? இல்லை பழசுகளே தானா தெரியவில்லை!

  • கம்யூனிஸ்டுகள் இவ்விஷயத்தில் மந்தமாக இருப்பதாகவே படுகிறது.
  • வைகோ தென்ற்லாகக் கூட வீசவில்லை. (பிறகு எதற்கு புயல் பட்டம்?)
  • விஜயகாந்துக்கு வசனகர்த்தா லீவில் போய்விட்டாரோ?
  • மருத்துவர் மாலடிமை கூட்டணி முடிவாகும் வரை மௌனம் மேலானது என்றிருக்கிறாரா தெரியவில்லை. (மக்களுடன் கூட்டணி அவ்வளவு தானா?)
  • தேஜ கூட்டணி ஆட்சியில் வெங்காய விலை உயர்வை வைத்து தம் கட்சித் தலைவரை வெங்காய நாயுடு என்று ஏசிய காங்கிரசை இன்னும் பாஜக 2G, JPC என்று பேசியே எதிர்ப்பது ஏன்?

ஒரு காலத்தில் கவிதை எழுதி மக்கள் பிரச்சினைகளை வெளிச்சத்துக்குக் கொணர்ந்த  கவிஞர்கள் இப்போது பேசாதிருப்பது ஏன்?

ஒரு ரூபாயில் அரிசி ரேஷன் கடைகளில் எப்போதாவது கிடைக்கிறது. காய்கறிகள் கிலோ 80 ரூபாய், பருப்பு வகைகள் கிலோ 150 ரூபாய். கேஸ் சிலிண்டர் விலை 375 ரூபாய், அது மேலும் உயருமாம்!

வயிற்றில் போட ஈரத்துணி இலவசம் என்று அடுத்த தேர்தல் அறிக்கையில் திமுக வினர் சொல்வார்களோ?

இந்நிலையில், மக்களின் வயிற்றுப்பாடு பற்றிய கேள்விக்குக் கருணாநிதியின் நையாண்டி பதிலும்   அமைச்சர்களின் சிரிப்பும் ஒரு வாத்தியார் பாட்டை நினைவுக்குத் தருகிறது.

வயிறு வலிக்கச் சிரிப்பவர்கள் மனித ஜாதி…

பிறர் வயிறெரிய சிரிப்பவர்கள் மிருக ஜாதி…

மனிதன் என்ற போர்வையில்,

மிருகம் வாழும் நாட்டிலே

நீதிஎன்றும் நேர்மை என்றும்

எழுதி வைப்பார் ஏட்டிலே!

அங்கே சிரிப்பவர்கள் சிரிக்கட்டும்

அது ஆணவச் சிரிப்பு……. ஆணவச் சிரிப்பு!!

வரும் தேர்தலிலாவது தமிழக மக்கள் சிந்தித்து வாக்களிக்க வேண்டும். இல்லையென்றால் நல்வாழ்வு வெங்காயம் தான். தேடத் தேட அழுகாச்சி தான் மிஞ்சும்.

கருணாநிதி தாமதித்து விட்டார்!

December 24, 2010

1972ல் எம்ஜிஆர் அவர்கள் திமுக தலைவர் உட்பட பொறுப்பில் இருப்போர் கணக்குக் காட்ட வேண்டும் என்று கேட்டார். அதனால்  அவர் திமுகவிலிருந்து நீக்கப்பட்டார். தனிக் கட்சி கண்டார். 13 ஆண்டுகாலம் தமிழகத்தின் தனிப் பெருந்தலைவனாக ஆட்சி செய்தார். கட்டம் கட்டிய கருணாநிதி 1984 ல் எம்ஜிஆர் மருத்துவம் பார்க்க அமெரிக்கா சென்ற போது என்னிடம் ஆட்சியைத் தாருங்கள், எம்ஜிஆர் வந்ததும் அவரிடமே பத்திரமாக திருப்பித் தந்து விடுகிறேன் என்று மக்களிடம் கெஞ்சிப் பார்த்தார். பலிக்கவில்லை.

1989ல் அதிமுக பிளவுபட்டதால் வென்றார். 1991ல் ராஜீவ் மறைவு அனுதாபத்தில் தோற்றார். 1996ல் வாய்ப்பிருந்தும் வம்பெதற்கு என்று கருதி ஜாக்கிரதையாக எம்ஜிஆர் என் நண்பர் என்று சொல்லி பிரச்சாரம் செய்தார். 2001ல் தன்னை முன்னிலைப்படுத்தித் தோற்றார். பின் வந்த 2004 பாராளுமன்றம் மற்றும் 2006 சட்டமன்றத் தேர்தல்களில் கருணாநிதி எம்ஜிஆரி பெயரைச் சொல்லி வென்றார். 2009 பாராளுமன்றத் தேர்தலில் கருணாநிதி செய்த ஒரு அதிரடிப் பிரச்சாரம் இது:

எம்ஜிஆர் உயிருடன் இருந்த போது பிஜுபட்நாயக் திமுக-அதிமுக இணைப்பிற்கு என்னிடம் பேசினார். நான் பெருந்தன்மையோடு ஒப்புக் கொண்டேன். எம்ஜிஆர் சரியென்றார். ஆனால் பண்ருட்டி இராமச்சந்திரன் அவர் மனதைக் கலைத்து விட்டார்.

பிஜு பட்நாயக், எம்ஜிஆர் இருவரும் இப்போது உயிருடனில்லை. அதனால் அவர்கள் இருவரையும் கேட்க முடியாது. பண்ருட்டி இராமச்சந்திரன் நிச்சயம் இதை மறுப்பார். இவர் மீது குற்றம் சுமத்துவார். இவர் சொல்வதன் நம்பகத்தன்மை இதனால் கேள்விக்குறியாகிறது.

இப்போது 2010ல் 176000 கோடியில் மூழ்கிய பிறகு கணக்குக் காட்டுகிறேன், கண்ணிருப்போர் காண என்று ஒரு அறிக்கை விடுகிறார். அதில் உள்ள குளறுபடிகள் ஏராளம்.

என் கருத்து: 1972ல் எம்ஜிஆர் கேட்டபோதே கணக்கைக் காட்டியிருந்தால், கருணாநிதிக்கு 13 ஆண்டு அரசியல் வனவாசம் கிட்டியிருக்காது.

என் கேள்வி: ஒரு சொத்துக் கணக்குக் கேள்விக்கான (ஒப்புக்குச் சப்பாணி) பதிலைச் சொல்ல 38 வருடங்கள் எடுத்துக் கொள்ளும் கருணாநிதி காவிரி, முல்லைப் பெரியாறு, இராமேஸ்வரம் மீனவர், ஈழத் தமிழர் மறுவாழ்வு போன்ற பிரச்சினைகள் சம்பந்தமாக எழுப்பப்படும் கேள்விகளுக்குச் சரியானபடி பதிலளிக்க எத்தனை ஆண்டுகள் எடுத்துக் கொள்வார்?

_______________________________________________________

கீழ்க்காணும் கேலிச் சித்திரம் கேலி செய்வது திமுகவையா திருவாளர் பொது ஜனத்தையா? தக்க காரணங்களுடன் விளக்குவோர்க்கு 2G ஸ்பெக்ட்ரம் குறித்த என் பதிவுகளின் link இலவசமாக அனுப்பி வைக்கப்படும்.

(இது தினமணியிலோ, துக்ளக்கிலோ வந்த கார்டூன். எதில் வந்ததோ courtesy அந்தப் பத்திரிகை. மதி வளர்க!)

தில்லுமுல்லு – A film by UPA-II

December 19, 2010

176000 கோடி 2G அலைக்கற்றை ஊழல் அலையில் அடித்துச் செல்லப்பட்டுச் சற்றே மக்கள் கண்களுக்கு மறைவாக இருந்த காமன்வெல்த் விளையாட்டுப் போட்டி ஊழல் (ரூ.70000 கோடி) பற்றிய விசாரணையில் ஒரு தில்லாலங்கடித் தில்லுமுல்லு நடந்திருக்கிறது. அது இந்த அரசு துறைசார்ந்த மற்றும் அமைச்சரவை சார்ந்த என்று எடுக்கும் நடவடிக்கைகள் பற்றிய மிகப் பெரிய சந்தேகத்தை ஏற்படுத்தியுள்ளது.

காமன்வெல்த் விளையாட்டுப் போட்டி ஏற்பாடுகளில் ஊழல் என்று குற்றச்சாட்டு வந்ததும் வழக்கம் போல மறுத்து, இலண்டனில்  உள்ள இந்திய தூதரகத்து மக்கள் சொல்லித் தான் செய்தேன் என்று கல்மாதி சொல்ல, எங்களை வம்புக்கிழுத்தால் கல்மாதிக்குக் கருமாதிதான் என்று தூதரகம் மிரட்ட, ஒரு வழியாக விளையாட்டுப் போட்டிகள் முடிந்துவிட்டன. ஊழல் விசாரணைக்கு அதிகாரமில்லை என்று ஒரு ஆட்டம் ஆடி, வேறு வழியில்லை என்றதும் கட்சிப் பதவியைத் துறந்தார் கல்மாதி.

இந்திய ஒலிம்பிக் கவுன்சிலுக்கு இன்னும் அவர் தான் தலைவர்! இவர் ஏதோ கட்சிப் பணத்தைச் சாப்பிட்ட மாதிரி கட்சிப் பதவியை விட்டு தூக்கி விட்டால் சரியா என்று கேட்கக்கூடாது. கேட்டால் அவ்வளவுதான். நீங்கள் ஆர் எஸ் எஸ், பாஜக ஆதரவாளராக, மதவெறியராக முத்திரை குத்தப்படுவீர்கள். தமிழகத்தில் ஆ.ராசாவை எதிர்ப்போர் தலித் எதிரிகள் என்று சொல்லவில்லையா? தமிழக அளவில் சாதிவெறி முத்திரை என்றால் என்றால், தேசிய அளவுக்கு ஒரு மதவெறி முத்திரை.

ஒரு கட்டத்தில் இனி முடியாது என்ற போது மாண்புமிகு பாரதப் பிரதமர் காமன்வெல்த் விளையாட்டு ஊழல் குறித்து விசாரிக்க ஒரு குழு அமைத்தார். V.K .ஷுங்க்லு (பெயர் ஆந்திராக் காரர் போல  இருக்கிறது. எந்த ஊர்க்காரர் தெரியவில்லை)என்பவர் தலைமையிலான அந்தக் குழு நிதி முறைகேடுகள் பற்றி விசாரிக்கும், அரசுக்கு அறிக்கை அளிக்கும். அதன்படி முடிவு செய்து நடவடிக்கை எடுப்போம் என்று சிங்கமாய்க் கர்ஜித்தார் இந்த அப்பழுக்கற்ற நேர்மைச் சிங்கனார்.

இந்த V.K .ஷுங்க்லு 8 ஆண்டுகளுக்கு முன்பு CAG ஆக இருந்து ரிடையர் ஆனவர். ஆ.ராசா வெவரத்தின் சிகரமாக வாரிக் கொடுத்தால் நாடு இழந்தது 176000 கோடி என்று கணக்குச் சொன்னதும்,  “இவர்கள் எப்படி எழுதுவார்கள் தெரியாதா என்று இலக்கிய விமர்சனம் போல ஆரம்பித்து, அவர்கள் எழுதுவது இறுதித் தீர்ப்பல்ல” என்று இறுதியில் சட்டபூர்வமாகத் தமிழக முதல்வர் விமர்சித்தாரே… அதே  CAG தான்.

இதில் ஆதாய முரண் இருப்பதாக ஒரு புதிய பூதம் கிளம்பியது. (conflict of interest என்பதற்குத் தமிழ்ச் சொல் தேடியபோது விக்சனரியில் கிடைத்தது இந்தச் சொல்.  அருஞ்சொற்பொருள்:பொதுப் பொறுப்பில் உள்ள ஒருவர், அப்பொறுப்பு தனக்களிக்கும் அதிகாரத்தால் தனிப்பட்ட லாபத்தை அடையக்கூடிய சூழ்நிலை ஆதாய முரண் எனப்படுகிறது.) ஷுங்க்லுவுக்கு என்ன ஆதாயம் இதில்?

அது புரிய சற்றே பின்னோக்கி வரலாற்றைப் பார்த்தல் அவசியம். சத்யம் கம்பியூட்டர் நிறுவனம் நிதி மோசடியில் ஈடுபட்டு அதன் ஆடிட்டர்கள் கூட கூடச் சேர்ந்து ஆடிட்டார்கள் என்று குற்றம் சாட்டப்பட்டது நினைவிருக்கலாம். அந்த சத்யம் நிறுவனத்துக்கு ஆடிட்டர் வேலை பார்த்த PwC (Price waterhous Coopers) என்ற நிறுவனம் தன் பறிபோன நற்பெயரைத் மீட்டெடுக்க சற்றே பெரிய மூளைக்கார மனிதர்களை தனக்கு ஆலோசகர், இயக்குநர் என்று நியமித்துக் கொண்டது.

அத்தகைய பெரிய மூளைக்கார மனிதர்களில் ஒருவர் தான் ஷுங்க்லு. நாடு முச்சூடுக்கும் கணக்கு வழக்குப் பார்த்தவர் என்பதால் அவரை கரம் கூப்பி அழைத்து உட்கார வைத்துக் கொண்டது  PwC. இந்த PwC டில்லி வளர்ச்சி ஆணையத்துக்கு (DDA) காமன்வெல்த் விளையாட்டுப் போட்டி நடத்துவது தொடர்பாக ஆலோசனை வழங்கியது.  அந்த மாதிரி ஏதாவது ஆதாய முரண் இருந்தால் நான் PwC வேலையை விட்டுவிடுவேன் என்றால் ஷுங்க்லு.

ஷுங்க்லுவுக்கு தரப்பட்ட விசாரணை வேலை DDA செய்த முறைகேடுகளையும் சேர்த்தே இருக்கிறது. இது போக நிர்வாக சீர்கேடு, நிதி மோசடி, தேவையற்ற செலவு, தரமற்ற கட்டுமானம் இவையெல்லாம் அவர் விசாரணை வளையத்தில் வருகிறது. இது போக Queen’s Baton Relay ஓட்டத்துக்கு PwC ஆலோசகர் பணிக்கு விண்ணப்பித்திருந்தது, ஆனால் கிடைக்கவில்லை. இதையும் சேர்த்தே அவர் விசாரிப்பார். தான் சார்ந்த நிறுவனம் தோற்ற ஒரு விஷயத்தை அவர் விசாரிப்பது நியாயப்படி செல்லாது.

மேலும் அரசியல் சாசனத்தின் Article 148(4) இப்படிச் சொல்கிறது.  “The Comptroller and Auditor General of India shall not be eligible for further office either under the government of India or under the government of any state after he has ceased to hold office.” அதாகப்பட்டது, தலைமைக் கணக்குப்பிள்ளை ஓய்வு பெற்ற பிறகு மையஅரசும் அல்லது அது சார்ந்ததுமான பணிகளையோ பொறுப்புகளையோ, எந்த மாநில அரசும் அல்லது அவை சார்ந்ததுமான பணிகளையோ பொறுப்புகளையோ ஏற்கக் கூடாது. ஷுங்க்லுவோ தான் இந்த விசாரணை வேலைக்காகச் சம்பளம் என்று பைசா வாங்கவில்லை அதனால் இந்தப் பொறுப்பை ஏற்றது தவறல்ல என்கிறார்.

மூத்த வழக்கறிஞர்கள் மற்றும் ஓய்வு பெற்ற (நீதி தவறாத) நீதிபதிகள் இது அரசியல் சாசனத்தின் எழுத்தைப் பிடித்துக் கொண்டு நோக்கத்தைக் கைவிடும் செயல் என்கின்றனர். மற்ற சில வழக்கறிஞர்கள் அதெல்லாம் தப்பில்லை, அதான் பைசா வாங்கலையே என்கின்றனர். இப்படி ஓய்வுக்குப் பின் பணிஏற்கக்கூடாது என்று சொன்னதே ஓய்வுக்குப் பின் பெரிய பொறுப்பு கிடைக்கும் என்று ஆசைகாட்டி CAG முதலிய பொறுப்பான பதவியில் இருப்போரை ஆளும் அரசு ஆட்டி வைக்கக்கூடாது என்பதற்காகத்தான்.  ஆக அரசியல் சாசனத்தின் நோக்கத்தை நோகாமல் காற்றில் விட்டிருக்கிறார்கள் இதில்.

பிரதமர் அலுவலகம் வழக்கம் போல “அப்படியா? ஆதாய முரணா? அமைச்சரவை செயலர் என்ன ஏது என்று பார்த்துச் சொல்வார். கொஞ்சம் பொறுங்கள்” என்றது. அக்டோபரில் இருந்து இன்னும் அமைச்சரவை செயலர் பார்த்துக் கொண்டேருக்கிறார். இன்றுவரை எதையும் சொல்லக் காணோம்.

CBI, CVC போன்ற விசாரணை நிறுவனங்கள் கல்மாதியும் அவர் சார்ந்தோரும் ஒத்துழைப்பு என்றால் என்ன பண்டம் என்று கேட்கிறார்கள் என்று புலம்பிக் கொண்டிருக்க, ஷுங்க்லு மட்டும் “யாரிடமும் ஒரு பிரச்சினையும் இல்லை, ஒரு முப்பது நாப்பது பேரை இதுவரை விசாரிச்சுட்டேன். நல்லாவே ஒத்துழைக்கிறாங்க” என்கிறார். CBI, CVC இவர்களுக்கெல்லாம் விசாரிக்கத் தெரியாதா, இல்லை ஷுங்க்லு ஏதாவது தனிச்சிறப்புமிக்க முறையில் விசாரித்தாரா? (அறிக்கையில் விசாரணை முறை பற்றியும் சொல்வார் என்று நம்புவோம்.)

இதைவிட அவர் செய்த இன்னொரு செயல் தான் அவரது நம்பகத்தன்மையைக் கேள்விக்கு உள்ளாக்கி இருக்கிறது. “இதுக்கும் மேல என்னத்த செஞ்சிருக்கப்போறாரு” என்று நினைப்போர் சற்றே நிற்க.

நம்ம சுரேஷ் கல்மாதி இன்னும் தலைவராக இருக்கும் இந்திய ஒலிம்பிக் கவுன்சிலுக்கு என்று கணக்கு வழக்கைப் பார்க்க ஒரு ஆடிட்டர் நிறுமம் இருக்கிறது. தினேஷ் மேத்தா & கோ என்று பெயர். நம்ம ஷுங்க்லு நேராக அந்த நிறுவனத்திடம் போய் “இந்தமாதிரி இந்தமாதிரி கையாடல் நடந்து போச்சாம். அதை தணிக்கை செய்ய பிரதமர் சொல்லிருக்காரு. அதுக்கு கணக்கு புத்தகங்களை தணிக்கை செய்ய நீங்க உதவி செய்யணும்” என்று கேட்டார். இது தப்பில்லையா என்று கேட்டால் “மொத்தமா ஒரு 50 பேர் வேலை செய்வாங்க என் விசாரணைக் கமிட்டில. அதுல தினேஷ் மேத்தா & கோ காரங்க ஒரு 5% இல்ல 6% தான் இருப்பாங்க. இதப் போயி பெருசா பிரச்சினைன்னு பேசிக்கிட்டு…. சோலி கீலி இருந்தா பாருங்கப்பா” என்று பத்திரிக்கையாளர்களிடம் பேசினார்.

களவாடியது பற்றி விசாரிக்க கல்மாதியின் ஆடிட்டர், சுருட்டியது பற்றி கோர்ட்டில் பேச ஆ.ராசவின் வக்கீல்…. இன்னும் 2G பற்றித் தனியே கபில்சிபல் ஒரு நீதிபதியைக் கொண்டு விசாரிக்கிறார். அதில் என்ன கோக்குமாக்கு இருக்கிறதோ? தில்லுமுல்லுகளை மறைக்க மேலும் மேலும் தில்லுமுல்லுகளைச் செய்து இவர்கள் திருந்தாத ஜென்மங்கள் என்று நிரூபித்து வருகிறார்கள்.

தவறு செய்தவன் திருந்தப் பார்க்கணும் தப்பு செய்தவன் திருந்தியாகணும்….. எழுதிய கவிஞர் வாலி சொல்வாரா எப்போது என்று!!!

ஏலேலோ ஐலசா! ஏலகிரி ஐலசா!!

December 15, 2010

உன்னிடத்தில் என்னைக் கொடுத்தேன் என்று ஒரு படம். விக்ரமன் இயக்கியது. கார்த்திக், ரோஜா மற்றும் பலர் நடித்தது.  அதில் ஒரு காமெடி காட்சி வரும். கார்த்திக்கும் ரமேஷ்கண்ணாவும் பணக்கார வீட்டில் நற்பெயர் பெற்று  கிட்டத்தட்ட முக்கிய விருந்தினர் போலத் தங்கியிருப்பர். இரவு 11 மணிக்கு ACஐ 20 டிகிரியில் வைத்துக் கொண்டு, வீட்டுச் சமையல்காரனிடம் ஐஸ்க்ரீம் கேட்பர். குளிர் தாங்காது கம்பளியைப் போர்த்திக் கொண்டு உட்கார்ந்திருக்கும் இருவரும் ஐஸ்க்ரீம் கொண்டு வந்த சமையல்காரனிடம் ஏசியை இன்னும் 2 டிகிரி குறைக்கச் சொல்வர். சமையல்காரன் போனதும் “நாம ஓவரா போறோமோ?” என்று கேட்டுக் கொள்வர்.

இந்தக் காட்சியை நான் நினைத்துக் கொண்டத்ற்கும் தமிழக முதல்வர் மார்கழி பிறக்க மூன்று நாட்கள் இருக்கையிலே, பாதித் தமிழகம் வெள்ளத்தில் மிதக்கையிலே ஏலகிரிக்கு ஓய்வெடுக்கச் சென்றதற்குதத சம்பந்தம் இருப்பதாக யாரேனு்ம் எண்ணிக் கொண்டால் நான் பொறுப்பல்ல. ஏலகிரிக்குப் போன முதல்வரே பொறுப்பு!

1956 ஆம் ஆண்டு திராவிட நாடு இதழில்  அறிஞர் அண்ணா எழுதிய கடிதங்கள் சில படித்தேன்.  அவற்றிலிருந்து சில வரிகளை இங்கே தருவேன். ஏலகிரிப் பயணத்தை இது இடித்துரைப்பதாக யாரேனு்ம் எண்ணிக் கொண்டால் நான் பொறுப்பல்ல. ஏலகிரிக்குப் போன முதல்வரே பொறுப்பு!

வெள்ளையாட்சிக் காலத்தில், கோடையின்போது, “ஊட்டி’ செல்வர். இங்கு மேடையில் “கோடை இடி’ யெனக் காங்கிரசார் முழக்கமிடுவர், “கேளுங்கள் தேச மகா ஜனங்களே! இங்கு கொளுத்தும் வெய்யிலில், கால் கொப்பளிக்கும் நிலையில், கை புண்ணாகும் நிலையில், கண் பூத்துப் போகும் நிலையில், நாம் பாடுபடுகிறோம்; மண்டை பிளந்து போகிறது இங்கு; நமது வரிப் பணத்தைக் கொள்ளையடிக்கும் கொலைகாரக் கும்பல், கோடை தாக்காதிருக்க, ஊட்டிக்குப் போயிருக்கிறார்கள், உல்லாசமாகக் காலங் கழிக்க!! இதுவா தர்ம ராஜ்யம்? இதுவா இராம ராஜ்யம்!! – என்று வெளுத்து வாங்கினார்கள்.

கோடை இடிகள் கோலோச்சுவோராகிவிட்டனர்; இப்போது ஊட்டியில் ஆரன்மூர் அரண்மனையை வாங்க ஏற்பாடாகி வருகிறது.

பஞ்சம் பட்டினி போக்காவிட்டாலும், சொந்த நாட்டான் பிச்சை எடுப்பதைக் கண்டு ஒரு சொட்டுக் கண்ணீர் விடாவிட்டாலும், சோற்றுக்கில்லாதானே! செத்துத் தொலை! என்று இலங்கையில் உள்ள சர்க்கார், தமிழனைச் சுட்டுத் தள்ளக் கண்டும் துளி பதறாவிட்டாலும், கள்ளச்சாராயம் பொங்கு வதையும் கள்ளமார்க்கட் பெருகுவதையும் கண்டும் காணாதது போலிருந்துவிட்டாலும், மீண்டும் காமராஜர் ஆட்சிதான் வரவேண்டும் என்று காங்கிரஸ்கட்சி கருதக் கடமைப்பட்டிருக்கிறது.

குமரி மாவட்டம்  கடலோடு சங்கமித்துச் சற்றொப்ப ஒரு வாரத்திற்கும் மேலாகிவிட்டது. இந்நிலையில் கீழ்வரும்  அண்ணாவின் வரிகளுக்கும்,  இளைஞன் படவிழாவில் அவர்தம் அருமைத் தம்பி கலந்து கொண்டு இன்புற்றதற்கும் சம்பந்தம் இருப்பதாக யாரேனு்ம் எண்ணிக் கொண்டால் நான் பொறுப்பல்ல. இளைஞன் படவிழாவில் இன்புற்ற முதல்வரே பொறுப்பு!

ஆட்சியாளர்கள் இந்த அவதி துடைத்திடுவோம் என்று உறுதி அளிக்கக் காணோம் – அதற்கான திட்டம் தீட்டுவதாகவும் தெரியவில்லை – அப்படி ஒரு பிரச்சினை இருப்பதை அவர்கள் ஒப்புக்கொள்வதாகவும் தெரியக் காணோம்.

அதுமட்டுமல்லாமல் ’59ல் திமுக வினர் கோஷமிட்ட சில வசனங்கள் இதோ:

“குடல் எரியுது; கும்பி கருகுது; குளு குளு ஊட்டி ஒரு கேடா?”

“ஆண்டது போதாதா? மக்கள் மாண்டது போதாதா?”

ஆறுதலாக ஓரிரு சொற்கள்:

இடுக்கண் வருங்கால் நகவேண்டுமென்ற வள்ளுவன் வாக்கு காற்றோடு போகலாமா தமிழா?

தீதும்  நன்றும் பிறர்தர வாராயெனும் பொன்மொழியே நம் செம்மொழியாம்…. இந்தப் பாடலைக் கேள். ஏ.ஆர். ரஹ்மானின் இசையில் இன்ப வெள்ளம் தேனாகப் பாய்கிறதே!

மறுபடியும் வெள்ளமா!!!

(கடைசி இரு சொற்களை வடிவேலு ஸ்டைலில் யாரேனும் படித்துக் கொண்டால் நான் பொறுப்பல்ல, அப்படிப் பேசிப் பழக்கிவிட்ட வடிவேலுவே பொறுப்பு!)


%d bloggers like this: